काठमाडौं । प्रतिनिधि सभा सदस्य गंगा चौधरीले दिनदहाडै छिमेकी देशले सिमा मिचेर आफ्नोे नागरिकलाई आफ्नै देशमा शरणार्थी बनाउँदा समेत सरकार नबोलेको बताउनुभएको छ ।
बिहीरबार प्रतिनिधि सभा बैठकमा बोल्दै सांसद् चौधरीले छिमेकीको सुरक्षाकर्मीले आफ्नो नागरिकलाई तुइनको तार काटी नदीमा खसाल्दा पनि सरकारको एउटा विज्ञप्तिसम्म नआएको बताउनुभयो । ‘अब भन्नुस् राष्ट्रियता कहाँ खोज्ने सभामुख महोदय ?’ उहाँले प्रश्न गर्नुभयो ।
दिनदहाडै ६/६ जनाको हत्या गर्ने व्यक्तिको संरक्षक व्यक्ति राष्ट्रको उच्च ओहदामा रहेको भन्दै उहाँले प्रधानमन्त्री शेरबहादुर देउवाको आलोचना गर्नुभयो । ‘अन्यायमा परेका जनताले कहिले न्याय पाउलान् ?’ चौधरीले प्रश्न गर्नुभयो ।
अफ्नो समुदायको हक अधिकारको लागि आवाज उठाएकै कारण रेशम चौधरी अपराधीको रुपमा जेलमा रहेको उहाँले बताउनुभयो । ‘आज रेशम चौधरी आफ्ने समुदायको हक अधिकारको लागि आवाज उठाउने अपराधी भए, तर २३ जना जिउँदै जलाउने चाहीँ लोकतन्त्रवादी भए ?’ उहाँले भन्नुभयो ।
मानवता विरुद्धको अपराध गर्ने अफ्ताब आलमलाई छुटाउन सरकारले प्रपञ्च गरिरहेको चौधरीले बताउनुभयो । यसो भयो भने गरिब र पहुँच नहुनेले कहिल्यै न्याय नपाउने उहाँले बताउनुभयो ।
