काठमाडाैं । सरकारले अब काठमाडौं लगायत बढी जनघनत्व भएका तराईका जिल्ला युवा र विद्यार्थीलाई प्राथमिकतामा राखेर काेभिड विरुद्धकाे खाेप दिने भएकाे छ ।
बिहीबार बसेकाे प्रतिनिधि सभा बैठकमा बाेल्दै स्वास्थ्य तथा जनसंख्या राज्यमन्त्री उमेश श्रेष्ठले अब खाेपकाे प्राथमिकतामा राखिने बताउनुभयाे । विद्यार्थीहरुलाई खाेप लगाउनका लागि फाइजर र माेर्डनाकाे खाेप ल्याउने प्रक्रिया अगाडि बढाइएकाे उहाँले बताउनुभयाे ।
सरकारले खोप अभियान अन्तर्गत दैनिक १ लाख देखि २ लाख डोज लगाउने कार्यक्रम सुरु गरेको उहाँले दाबी गर्नुभयाे । असोज मसान्तसम्म १ करोड ८ लाख डोज खोप प्राप्त हुने सुनिश्चत भएको पनि उहाँले बताउनुभयाे ।
आगामी असोज मसान्तभित्र ३३ प्रतिशत जनतालाई खोप लगाउने गरी कार्यक्रम अगाडि बढेकाे उहाँले बताउनुभयाे । राज्य मन्त्री श्रेष्ठले १८ देखि ३० वर्ष उमेर समूहका विद्यार्थीहरुलाई छिट्टै काेभिड विरुद्धको खोप दिने पनि बताउनुभयाे । उहाँले भन्नुभयाे - '१८ देखि ३० वर्षका विद्यार्थीका लागि छिट्टै खोप दिने योजना छ, हाल मौजुदामा रहेको कोभिशिल्ड खोप दिने योजना बनाइएको छ ।'
निजी क्षेत्रसँगको साझेदारीबाट खोप कार्यक्रमलाई अघि बढाउने पनि राज्यमन्त्रीले बताउनुभयाे । खाेप केन्द्रकाे संख्या पनि बढाइने उहाँले बताउनुभयाे ।
