काठमाडाैं । संसदीय दलका नेता केपी शर्मा ओलीको मानसिक स्वास्थ्यबारे प्रश्न उठाइएको भन्दै । प्रमुख प्रतिपक्षी नेकपा एमालेले सदनमा नियमापत्ति जनाएको छ ।
बिहीबार बसेको प्रतिनिधि सभा बैठकमा माओवादीका सांसद् मातृका यादवले अमर्यादित अभिव्यक्ति दिनुभएकाे थियाे । एमाले प्रमुख सचेतक विशाल भट्टराईले यादवको भनाइ रेकर्डबाट हटाउन भन्दै नियमापत्ति जनाउनुभएकाे थियाे । मानसिक अवस्था ठीक नभएका कारण ओलीले बारम्बार परमादेशको सरकार भनिरहेको भन्दै यादवले अमर्यादित अभिव्यक्ति दिएकाे थियाे ।
'मैले पार्टीकाे बैठकका अध्यक्ष कमरेड प्रचण्डलाई भनेकाे थिएँ उहाँ (केपी ओली) मेन्टल्ली तथा फिजिकल्ली रुपमा ठिक हुनुहुन्न, त्यसैले कुनै पनि बेला दुर्घटना हुनुसक्छ, जिम्मेवारी किन बाेकाउनुहुन्छ, उहाँलाई किन अन्याय गर्नुहुन्छ, मैले एमालेका साथीहरुलाई के भन्न चाहान्छु भने जहाज गुडाउँदा क्यापटेनहरुकाे मेडिकल चेक हुन्छ, ओलीलाई देशकै जहाज गुडाउन दिएपछि दुर्घटना हुँदैन ? पार्टीमा दुर्घटना हुँदैन ? दुई तिहाइकाे सरकार खत्तम भएर गठबन्धनकाे सरकार बन्याे'- यादवकाे भनाइ थियाे ।
कसैको मानसिक स्वास्थ्यबारे प्रश्न उठाउने अधिकार कसैलाई नभएकाे भन्दै विशालले प्रश्न गर्नुभयाे - 'व्यक्तिप्रति लक्षित गरेर मानसिकता खराब भएकाे, मेन्टल्ली डिसअर्डर जस्ता अभिव्यक्ति पटक पटक दाेहाेर्याएर भन्नुभयाे, म प्रश्न गर्न चाहान्छु - त्याे भन्ने अधिकार उहाँलाई कहाँ छ ? उहाँसँग के प्रमाण छ ? के तथ्यका आधारमा याे कुरा उहाँले गर्दै हुनुहुन्छ ?'
भट्टराईले यादवकाे भनाइ तत्काल रेकर्डबाट हटाउन ध्यानाकर्षण गराउँदै भन्नुभयाे - 'म प्रश्न गर्न चाहान्छु- प्रत्येक सदस्यले प्रत्येक सदस्यलाई यहाँ स्वास्थ्य परीक्षणबारे बताउन मिल्छ कि मिल्दैन ? उहाँसँग आधार के छ ? कसले प्रमाणित गरेकाे छ ? याे मर्यादित, सम्मानित, जनताकाे सार्वमाैमसत्ताकाे प्रयाेग हुने महत्वपूर्ण निकायमा यसखालका अमर्यादित र संसद्लाई नसुहाउने अभिव्यक्तिहरु दिन पाईंदैन, याे रेकर्डबाट हटाइयाेस् अन्यथा एमालेले कुनै हालतमा सहनेछैन ।'
