काठमाडाैं । प्रमुख प्रतिपक्षी नेता केपी शर्मा ओली विरुद्ध माओवादी सांसद्ले दिएकाे अभिव्यक्ति संसद्काे रेकर्डबाट हटाउन सभामुख अग्निप्रसाद सापकोटाले निर्देशन दिनु भएकाे छ ।
शुक्रबार बसेकाे प्रतिनिधि सभा बैठककाे सुरुमै नेकपा एमालेले ध्यानाकर्षण गराएपछि सभामुखले माओवादी सांसद् मातृका यादवले ओलीविरुद्ध बाेल्नुभएकाे अमर्यादित अभिव्यक्ति संसद्को रेकर्डबाट हटाउन निर्देशन दिनु भएकाे हाे । 'माननीय मातृका यादवले संसदको हिजोको विशेष समयमा बोल्ने क्रममा प्रयोग गर्नुभएको मेन्टल्ली फिजिकल्ली रुपमा फिट हुनुहुन्न भन्ने शब्दहरू प्रतिनिधि सभा नियमावलीको नियम २१ खण्ड (ङ) को प्रतिकुल देखिएकाले संसदको रेकर्डबाट हटाउन सचिवालयलाई निर्देशन दिन्छु'- सभामुखले भन्नुभयाे ।
बिहीबार नै यसबारे नियमापत्ति गरेपनि यादवले बाेलेकाे असंदीय र अमर्यादित शब्द रेकर्डबाट नहटाइएकाे भन्दै एमाले प्रमुख सचेतक विशाल भट्टराईले सभामुखकाे ध्यानाकर्षण गराउनुभएकाे थियाे । माओवादी सांसद् यादवले बिहीबार बसेकाे प्रतिनिधि सभा बैठकमा केपी ओलीकाे स्वास्थ्यप्रति अमर्यादित अभिव्यक्ति दिनुभएकाे थियाे ।
संसद् जस्ताे गरिमामय ठाउँ निम्छरा शब्द प्रयाेग गर्ने ठाउँ नभएकाे विशालले बताउनुभयाे । सत्तामा भएजसरी अहिले गाली गलाैचकाे केन्द्र केपी ओलीलाई बनाइएकाेमा उहाँले आपत्ति जनाउनुभयाे ।
भट्टराई बाेलेपछि अर्का एमाले सांसद् बाेल्न खाेज्नुभएकाे थियाे तर सभामुखले समय दिनुभएन । त्यसपछि एमाले सांसद् उठेर विराेध जनाए । त्यसपछि सभामुख अग्निप्रसाद सापकाेटाले त्यसमा आफ्नाे ध्यानाकर्षण भएकाे भन्दै मातृका यादवकाे असंसदीय अभिव्यक्ति रेकर्डबाट हटाउन निर्देशन दिनुभयाे ।
