काठमाडौं । प्रतिनिधि सभा सदस्य प्रेम सुवालले प्रेम सुवालले महाकालीमा वेपत्ता भएका जयसिंह धामीको खोजी गर्न भारतले ड्ररोन प्रयोग गर्न नदिएको भन्दै आपत्ति जनाउनुभयो ।
भारतीय सुरक्षाकर्मीले तुइन काटेर महाकालीमा वेपत्ता बनाइएका धामीको खोजिको बारेमा सरकारले के गर्दैछ भन्दै उहाँले ध्यानाकर्षण गराउनुभयो । ‘ड्ररोन प्रयोग गर्न नदिएको बारे नेपाल सरकार के गर्दै छ ?’, उहाँले प्रश्न गर्नुभयो ।
भारतले सो घटनामा एक छिमेकीले गर्ने सामान्य व्यवहार पनि नगरेको उहाँले बताउनुभयो । विगतमा तिब्बतमा घटना हुँदा एक नेपाली मारिएको घटनामा चीनका प्रधानमन्त्रीले माफी मागेर क्षतिपूर्ति दिएको उहाँले स्मरण गराउनुभयो । ‘एक मित्रले नेपालसँग माफी माग्छ, परिवारलाई समवेदना प्रकट गर्छ, क्षतिपूर्ति दिन्छ, आउँदा दिनमा तुइन चुडालेर वा फुकालेर नेपालीलाई नमार्ने कबुल गर्छ’, उहाँले भन्नुभयो ।
सो घटनामा सरकारले भारतको आधिकारिक धारणा माग्नु पर्ने बताउनुभयो । भारतीय राजदुतलाई बोलाए त्यस बारेमा सरकारले यथार्थ कुरा गर्नुपर्ने उहाँको भनाइ छ । उहाँले नेपालमा एमसीसी सम्झौता गरिए अफगानिस्तानकै हालत हुने बताउनुभयो । एमसीसी सम्झौता गरे नेपालका नेता पनि अफगानिस्तानका राष्ट्रपति भागेजस्तै भाग्नु पर्ने दिन आउने बताउनुभयो ।
