काठमाडौं । प्रमुख प्रतिपक्ष दल नेकपा एमालेको विरोधका बावजुत राष्ट्रियसभा बैठकले विभिन्न चारवटा विधेयक दफावार छलफलका लागि समितिमा पठाउने निर्णय गरेको छ ।
सोमबारको बैठकमा एमालेको विरोधकै बीच सरकारका तर्फबाट कानुन न्याय तथा संसदीय मामिला मन्त्री ज्ञानेन्द्रबहादुर कार्कीले ती विधेयक पेश गर्नुभएको थियो ।
बैठकमा महालेखापरीक्षकको अन्ठाउन्नौँ वार्षीक प्रतिवेदन २०७८ टेबल भएको छ । त्यस्तै प्रधानमन्त्री शेरबहादुर देउवाको तर्फबाट मन्त्री कार्कीले खाद्य स्वच्छता तथा गुणस्तर विधेयक २०७७, सार्वजनिक सेवा प्रसारण विधेयक २०७७, अभिलेख संरक्षण (पहिलो संशोधन) विधेयक २०७७ र सुरक्षण मुद्रणसम्बन्धी विधेयक २०७७ लाई दफावार छलफलका लागि विधायन व्यवस्थापन समितिमा पठाइयोस् भन्ने प्रस्ताव राख्नु भएको थियो । सो प्रस्तावलाई बैठकको बहुमतले स्वीकृत गरेको छ ।
