काठमाडौं । लुम्बिनी प्रदेशमा शंकर पोखरेल नेतृत्वको एमाले सरकारले ल्याएको बजेटलाई प्रतिस्थापन गर्ने प्रस्ताव पेश भएको छ ।
बुधबार प्रदेश सभा बैठकमा प्रदेश सरकारका आर्थिक मामिला तथा सहकारी मन्त्री कृष्णध्वज खड्काले सो प्रस्ताव पेश गर्नुभएको हो । सरकारले यस अघिको सरकारले ल्याएकै ४० अर्ब ९५ करोड ९७ लाख रूपैँयाको बजेटलाई विभिन्न शिर्षकमा रमान्तरण गरी प्रतिस्थापन विधेयक ल्याएको हो ।
नयाँ बजेटमा चालुतर्फ १३ अर्ब ६४ करोड ५७ लाख १० हजार र पुँजीगततर्फ २२ अर्ब ४७ करोड १५ लाख रुपैँया प्रस्ताव गरिएको छ । कोभिड महामारीबाट नागरिकलाई सुरक्षित राख्ने कुरालाई बजेटले प्राथमिकतामा राखेको छ ।
मुटुको भल्व फेर्ने तथा क्यान्सरका रोगीलाई थप उपचार गर्न प्रदेश सरकराले थप २ लाख रुपैँयासम्म उपलब्ध गराउने बजेटमा प्रस्ताव गरिएको छ ।
सरकारले जेष्ठ नागरिकसँग स्वास्थ्यकर्मी, सार्वजनिक सुलभ पसल, एक पालिका एक सामूहिक उद्यम, जेष्ठ नागरिक आवास, द्वन्द्व प्रभावित परिवार रोजगार कार्यक्रम, उज्यालो प्रदेश लगायतका कार्यक्रम ल्याएको छ ।
प्रदेश सभाको सो बैठक एमालेले भने वहिष्कार गरेको थियो । पार्टीले कारवाही गरेका सांसद् विमला वली र अजय शाहीलाई सभामुखले पदमुक्त नगरेसम्म एमालेले संसद् चल्न नदिने बताउँदै आएको छ । बुधबार दिउँसो एक बजे बसेको पहिलो बैठकमा नाराबाजी गरेर एमालेले अवरुद्ध गरेको थियो । त्यस पछि अपरान्ह चार बजे बसेको बैठकमा सो प्रस्ताव पेश गरिएको थियो ।
