काठमाडौं । रेल्वे विधेयक, २०७६ प्रतिनिधि सभाबाट फिर्ता भएको छ ।
भौतिक पूर्वाधार तथा यातायात मन्त्री रेणुकुमारी यादवले पेस गर्नुभएकाे विधेयक फिर्ता लिने प्रस्ताव प्रतिनिधि सभाको आजको बैठकले स्वीकृत गरेको हो । राष्ट्रिय सभामा उत्पत्ति भइ प्रतिनिधि सभामा विचाराधिन रहेको विधेयक फिर्ता लिन सहमतिका लागि राष्ट्रिय सभामा पठाइएको थियो ।
आजै बसेको राष्ट्रिय सभाको बैठकले विधेयक फिर्ता गर्न सहमति जनाएकाे थियाे । याेसँगै रेल्वे विधेयक संघीय संसद्बाट विधेयक फिर्ता भएको छ । एमालेकाे विराेधबीच अगाडि बढाइएकाे बैठककाे सुरुमा सभामुख अग्निप्रसाद सापकाेटाले राष्ट्रपति कार्यालयबाट मन्त्रिपरिषद् गठनसम्बन्धी पत्रको व्यहोरा पढेर सुनाउनुभएकाे थियाे ।
यसअघि जस्तै आज पनि बैठक सुरु हुनासाथ एमाले सांसद्ले बेल अगाडि आएर नाराबाजी गरेका थिए ।
प्रतिनिधि सभा बैठक दुई साताका लागि स्थगित गरिएको छ । बैठकमा सभामुख सापकोटाले अर्काे बैठक ९ कात्तिक बस्ने जानकारी दिनुभएकाे थियाे । राष्ट्रिय सभाको बैठक पनि अर्को सूचना जारी नभएसम्मका लागि स्थगित गरिएको छ ।
