काठमाडौं । संघीय संसद्काे दुबै सदनकाे बैठक आज बस्दैछ ।
मन्त्रिपरिषद्काे सिफारिसमा राष्ट्रपति विद्यादेवी भण्डारीले संघीय संसद्काे दुबै सदन प्रतिनिधि सभा र राष्ट्रिय सभाकाे बैठक आह्वान गर्नुभएकाे हाे । दुबै सदनकाे बैठक दिउँसाे २ बजे सुरु हुनेछ । सदनकाे बैठकका लागि साेमबार सबै सांसद्,संसद् सचिवालयका कर्मचारी मर्यादापालक,सुरक्षाकर्मी लगायतकाे एन्टिजेन विधिबाट काेभिड परीक्षण गरिएकाे थियाे ।
प्रतिनिधि सभाको दशौं अधिवेशनअन्तर्गतकाे पहिलाे बैठककाे सुरुमै सभामुख अग्निप्रसाद सापकाेटाले राष्ट्रपति भण्डारीबाट अधिवेशन आह्वानसम्बन्धी पत्र पढेर सुनाउनुहुने कार्यसूची रहेकाे संघीय संसद् सचिवालयले जनाएकाे छ । सभामुख सापकाेटाले अध्यक्षता गर्ने सदस्यहरुकाे मनाेनयन पनि गर्नुहुने कार्यसूची छ ।
बैठकमा गृहमन्त्री बालकृष्ण खाँडले ३ वटा अध्यादेश पेस गर्नुहुनेछ । उहाँले 'नेपाल प्रहरी र प्रदेश प्रहरी (कार्य सञ्चालन, सुपरिवेक्षण र समन्वय) (पहिलो संशोधन) अध्यादेश तेजाब तथा अन्य घातक रासायनिक पदार्थ (नियमन) अध्यादेश, २०७८ र सामाजिक सुरक्षा (पहिलो संशोधन) अध्यादेश, २०७८पेस गर्नुहुने कार्यसूची रहेकाे संसद् सचिवालयले जनाएकाे छ ।
भौतिक पूर्वाधार तथा संसदीय मामिला मन्त्री रेनुकमारी यादवले रेल्वे अध्यादेश, २०७८ पेस गर्नुहुनेछ । कानुनमन्त्री दिलेन्द्रप्रसाद बडूले 'यौन हिंसाविरूद्धका केही ऐनलाई संशोधन गर्ने अध्यादेश, २०७८' र 'फौजदारी कसुर तथा फौजदारी कार्यविधिसम्बन्धी केही ऐन संशोधन गर्ने अध्यादेश, २०७८' पेस गर्नुहुने कार्यसूची छ ।
दिउँसाे २ बजे नै सुरु हुने राष्ट्रिय सभा बैठककाे सुरुमै राष्ट्रिय सभा अध्यक्ष गणेशप्रसाद तिमिल्सिनाले राष्ट्रपति भण्डारीबाट अधिवेशन आह्वानसम्बन्धी पत्र पढेर सुनाउनुहुनेछ । राष्ट्रिय सभामापनि तेजाबसम्बन्धी लगायत ६ अध्यादेश पेस हुनेछन् ।
हेर्नुस् कार्यसूची:
