काठमाडौं । राष्ट्रिय सभा सदस्य देवेन्द्र दाहालले सङ्घीय संसद् सञ्चालनको विषयमा सरकार जिम्मेवार नभएको बताउनुभएको छ ।
सोमबार राष्ट्रिय सभा बैठकमा बोल्दै दाहालले प्रमुख प्रतिपक्षी दल नेकपा एमालेले उठाएका कुनै पनि माग सम्बोधन नगरेर सरकारले नै संसद् अवरुद्ध गरेको बताउनुभयो । एमालेले कारबाही गरेका सांसदलाई अहिले पनि प्रतिनिधि सभामा राखेर बैठक अवरुद्ध गर्ने काम गरिएको उहाँले बताउनुभयो । ‘सम्बन्धित पक्षले सुनेको नसुनेकै गर्ने र समय गुजार्ने काम मात्रै गरिएको छ’, दाहालले भन्नुभयो ।
परमादेशी सरकार बनेदेखि देशमा विकास निर्माणको काम ठप्प भएको उहाँले बताउनुभयो । गठबन्धनले अनेक खालका नाटक गरेको भन्दै उहाँले एमालेका माग सम्बोधन नभएसम्म सङ्घीय संसद्का दुवै सदनका बैठक चल्न नदिने बताउनुभयो ।
प्रमुख प्रतिपक्षी दलका सांसदले उठेर विरोध जनापछि सोमबारको राष्ट्रिय सभा बैठक स्थगित भएको छ ।
