स्थानीय तह निर्वाचनमा पञ्चायतमा भन्दा बढी सत्ता दुरुपयोग गरियो : केपी ओली

काठमाडौं । प्रतिनिधि सभामा प्रमुख प्रतिपक्षी दलका नेता केपी शर्मा ओलीले सत्ता पक्ष स्थानीय तह निर्वाचनमा जसरी पनि जित्नु पर्छ भन्ने नारा लिएर गएको बताउनुभएको छ । प्रतिनिधि सभाको बिहीबारको बैठकमा बोल्दै नेता ओलीले कब्जा गरेर भए पनि निर्वाचन जित्ने नीति बनाएर सत्ता गठबन्धन चुनावमा गएको उहाँले बताउनुभयो । ‘यस्तो नाङ्गो ढङ्गले राज्य संयन्त्रको दुरुपयोग गरेर कब्जै गर्ने खालको सत्ता पक्षीय क्रियाकलाप त पञ्चायतले पनि गर्दैन थियो, त्यति सारो यस पटक भयो’, उहाँले भन्नुभयो । सत्ता पक्षका नेताले प्रतिपक्ष निध्याउँछु भन्ने उद्घोषका साथ चुनावमा गएको उहाँले बताउनुभयो । यस्तो अवस्थामा चुनाव भएको उहाँले प्रष्ट पार्नुभयो । नेकापा एमाले त्यतिकै निर्वाचनमा आएको पार्टी नभएको बताउनुभयो । एमाले आफ्ना मूल्य मान्यता र इतिहास सहित चुनावमा आएको बताउनुभयो । एमाले लोकतन्त्रको पक्षमा दृढतापूर्वक आन्दोलन गरेर आएको पार्टी भएको उहाँले प्रस्ट्याउनु भयो ।