एमाले वैशाखी टेकेर होइन, आफ्ना खुट्टाले दौडिएर आएको पार्टी : केपी ओली

काठमाडौं । प्रतिनिधि सभामा प्रमुख प्रतिपक्षि दल नेकपा एमालेका नेता केपी शर्मा ओलीले नेकपा एमाले राष्ट्रिय स्वतन्त्रता र स्वाधीनताको पक्षमा निरन्तर लड्ने पार्टी भएको बताउनुभएको छ । प्रतिनिधि सभाको बिहीबारको बैठकमा बोल्दै नेता ओलीले एमाले सार्वभौम सत्ताको सम्मान र त्यसको व्यवहारिक प्रयोग गर्ने पार्टी भएको बताउनुभयो । ‘सत्ता स्वार्थलाई केन्द्र भागमा राखेर भौगोलिक अखण्डताको बारेमा, सार्वभौम सत्ताको बारेमा, स्वाधीनताको बारेमा चुँ बोल्न नसक्ने निरीह पार्टी होइन यो, यो राष्ट्रिय हितको पक्षमा दृढताको साथ उभिएर आएको पार्टी हो’, ओलीले भन्नुभयो । नेकपा एमाले सैद्धान्तिक रूपमा सरकारको प्रतीक्षामा उभिएको पार्टी नभएर व्यवहारिक र वास्तविक रूपमा नै सरकारको प्रतिक्षमा उभिएको पार्टी भएको उहाँले प्रष्ट पार्नुभयो । एमाले वैशाखी टेकेर होइन आफ्ना खुट्टाले दौडिएर आएको पार्टी भएको उहाँले बताउनुभयो । यस्तो पार्टीलाई सत्ता पक्षले निध्याउँछु भन्ने आँट कहाँबाट गरेको भन्दै उहाँले प्रश्न गर्नुभयो । प्रतिपक्षलाई निध्याउँछु भन्ने सत्ता गठबन्धनले राष्ट्रिय सहमतिको कुरा गर्न नमिल्ने उहाँले बताउनुभयो । सरकारले नीति तथा कार्यक्रममा राष्ट्रिय सहमतिको कुरा राख्नु हास्यास्पद विषय भएको उहाँले टिप्पणी गर्नुभयो ।