काठमाडौं । प्रदेश १ का मुख्य मन्त्री राजेन्द्र राईले प्रदेश–१ को नामाकरणको लागि पहल गरिदिन नेकपा एमालेलाई अनुरोध गर्नुभएको छ । माधव नेपालको पार्टी एकीकृत समाजवादीबाट मुख्यमन्त्री बन्नुभएका राईले एमाले प्रदेश सभाको सबैभन्दा ठुलो दल भएकोले एमालेले पहल कदमी लिइदिए नामाकरण गर्न सहज हुने बताउनुभयो । सोमबार प्रदेश–१ प्रदेश सभा बैठकमा भाग लिँदै मुख्मन्त्री राईले भन्नुभयो, सबैभन्दा धेरै सांसद् रहेको एमालेले लियो भने त्यो सबैभन्दा राम्रो कुरा हो, यसको सबैभन्दा पहल कदमी लिनु पर्ने एमालेले नै हो ।’ राईले यो काम एमालेले गर्दैन भने दायित्व लिएर कांग्रेस, अन्य दल वा सांसदको समूह मिलेर गरे पनि प्रशंसायोग्य काम हुने बताउनुभयो । ‘अहिले पनि नम्र निवेदन के छ भने, यो कामको नेतृत्व एमालेले गरिदिनुस्, किनभने सबैभन्दा बढी सांसद् एमालेसँग छ, होइन भने एमालेको कुनै नेता, सांसद संयोजक रहेको सबै पार्टीको एउटा समिति बनाइदिऊँ, त्यो कुरामा हामी इच्छुक छौँ’, उहाँले भन्नुभयो । कसैले पहल नलिँदा सरकारले काम सुरु गरेको उहाँले बताउनुभयो । सकेसम्म सहमतिबाट नाम टुङ्ग्याउनु पर्नेमा जोड दिँदै उहाँले नभए प्रक्रियामा लगेर भए पनि टुङ्ग्याउनु पर्ने बताउनुभयो । यसको सन्दर्भमा सरकारले केही काम सुरु गरेको बताउनुभयो ।
प्रदेश सभाको यो अधिवेशनले प्रदेशको नाम टुङ्ग्याउनै पर्नेमा उहाँले जोड दिनुभयो । ‘नामको कारण बदनाम भएका छौँ, हाम्रो निधारमा कालो टीका लागेको छ’, उहाँले भन्नुभयो ।
