काठमाडौं । नेपाली कांग्रेसका सांसद् भरतकुमार शाहले ट्राफिकले दिनहुँ लाइसेन्स चेक गर्न नहुने बताउनुभएको छ ।
मंगलबार प्रतिनिधि सभा बैठकमा बजेटमाथिको छलफलमा भाग लिँदै सांसद् शाहले काठमाडौंका मात्र नभएर देशभरका ७० प्रतिशत युवासँग लाइसेन्स नभएको थाहा हुँदा हुँदै पैसाको लागि ट्राफिकले दिनहुँ चेक गर्ने गरेको आरोप लगाउनुभएको छ ।
‘काठमाडौं उपत्यकामा मात्र नभएर देशका ७० प्रतिशत युवासँग लाइसेन्स छैन’ उहाँले भन्नुभयो–‘लाइसेन्स नभएको थाहा हुँदा हुँदै पनि साँझमा ट्राफिकले लाइसेन्स दिनहुँ चेक गर्छन । उनको काम धन्दा नै त्यहिँ भइसकेको छ ।’
‘ट्राफिकलाई थाहा छ लाइसेन्स छैन । दिनहुँ चेक गर्ने र दुई तीन सय रुपैयाँ लिएर छोडिदिने काम गरिरहनुभएको छ ।’ उहाँले बताउनुभयो ।
उहाँले यो देशको ठूलो समस्या भएको बताउदै भन्नुभयो– ‘यसरी चिटिङ गर्न पाईँदैन यो बाटोमा चोर पनि हिड्छन्, डाका पनि हिड्छन् र सज्जन पनि हिड्छन् । अनि के बाटोमा चेकिङ गरिरहने त्यस्तो हुँदैन ।’
उहाँले चेकिङ दुई कुरामा मात्र हुने औंल्याउदै भन्नुभयो– ‘चेकिङ दुई कुरामा मात्र हुन्छ संसारमा एक नियम कानुन तोडेको छ भने र दुई यदि ट्राफिकलाई खबर छ, त्यस गाडीमा गलत सामान र खराब मान्छे छन् भने मात्र चेकिङ हुन्छ ।’
ट्राफिक चेकिङ बन्द गर्नु पर्ने भन्दै उहाँले भन्नुभयो– ‘जहिले मन लाग्छ त्यहिँले बाटोमा बार लाएर पैसा असुल गर्ने काम कहिँ पनि हुँदैन । यो बन्द हुनुपर्छ ।’
