स्वर्गमा कानुन आवश्यक हुँदैन, नर्कमा कानुन बाहेक केही हुँदैन : गोविन्दप्रसाद शर्मा कोइराला

काठमाडौं । कानुन न्याय तथा संसदीय मामिला मन्त्री गोविन्दप्रसाद शर्मा कोइरालाले समाजलाई अध्ययन गरेर नै कानुन निर्माण र परिमार्जनको काम हुने बताउनुभएको छ । यौन हिंसा विरुद्धका केही ऐनलाई संशोधन गर्न बनेको विधेयक माथि प्रतिनिधि सभा सदस्यले उठाउनु भएको प्रश्नको जवाफ दिँदै मन्त्री कोइरालाले कुनै एउटा घटनाबाट प्रभावित भएर कानुन नबनाइने बताउनुभयो । समाजको सवाललाई अध्ययन, छलफल गरेर नै कानुन संशोधन र परिमार्जन गरिन्छ, भनिन्छ स्वर्गमा कानुन आवश्यक हुँदैन, नर्कमा कानुन बाहेक केही हुँदैन’, उहाँले भन्नुभयो । समाजको मूल्य मान्यता बिस्तारै कमजोर हुँदै जाँदा अपराधका घटना बढेको उहाँले बताउनुभयो । हदम्यादका कारणबाट कोही पनि अन्यायमा नपरोस् भन्ने कुरामा सरकार गम्भीर रहेको उहाँले प्रष्ट पार्नुभयो । उहाँले सर्वोच्च अदालतको फैसला अनुसार नै बलात्कारको घटनमा उजुरीको हदम्याद बढाएर एक वर्ष पुर्‍याइएको उहाँले बताउनुभयो । सो मुद्दामा हदम्याद नै नराख्ने विषयमा पनि सुझाव आएको बताउँदै उहाँले त्यस विषयमा सरकारले छलफल गर्ने र आवश्यक निर्णय लिने बताउनुभयो ।