सरकारलाई जगतबहादुर सुनार विश्वकर्माको प्रश्न : नेपालमा गुरिल्ला कहाँ छन् ? | Sunrise Khabar

काठमाडौं । प्रतिनिधि सभा सदस्य जनगतबहादुर विश्वकर्माले सरकारले बजेट ठिक ढङ्गले नल्याएको बताउनुभएको छ । सोमबार प्रतिनिधि सभा बैठकमा विनियोजन शीर्षक माथि खर्च कटौती प्रस्ताव राख्दै सांसद् विश्वकर्माले बजेटका कारण जनता निराश भएको बताउनुभयो । उहाँले गुरिल्ला दौड प्रतियोगिता आयोजना गर्ने भनेर बजेट राखेको भन्दै आलोचना गर्नुभयो । द्वन्द्व समाप्त भएर देश शान्ति प्रक्रियामा अघि बढिसकेको अवस्थामा द्वन्द्वकालको झल्को दिने गरी गुरिल्ला दौड आयोजना गरेर जनतालाई तर्साउने काम गर्न लागेको भन्दै उहाँले आलोचना गर्नुभयो । ‘आम जनमानसमा बजेट मार्फत मनोवैज्ञानिक आतङ्क सिर्जना गरिएको छ, सरकारको यो गलत नीति प्रति गम्भीर ध्यानाकर्षण भएको छ’, उहाँले भन्नुभयो । विस्तृत शान्ति सम्झौता, सेना समायोजन, गणतन्त्र स्थापना पछि पनि गुरिल्ला उफारेर सरकारले के गर्न खोजेको भन्दै उहाँले प्रश्न गर्नुभयो । ‘नेपालमा गुरिल्ला कहाँ छन् ? छापामार कहाँ छन् ? कति संख्यामा छन् ? कसले संरक्षण गरिराखेको छ ? यो म्याराथुन प्रतियोगितामा कहाँका गुरिल्ला सहभागी हुने हुन् ? हाम्रो देशमा गुरिल्ला छन् भने सरकारले कानुनी दायरामा किन नल्याएको ?’, उहाँले प्रश्न गर्नुभयो । अझै पनि जनयुद्धको झल्को दिएर मनोवैज्ञानिक रूपमा आतंकित पार्ने गरी बजेट ल्याएको विश्वकर्माले बताउनुभयो । ‘जनतालाई हायलकायल खेलाउने र आगामी निर्वाचनलाई प्रभावित पर्ने चाल बाहेक अरू के हो ?’ उहाँले थप प्रश्न गर्नुभयो । सरकारबाट शान्ति प्रक्रियालाई नै प्रभावित गर्ने काम सरकारले गरेको उहाँले बताउनुभयो । विश्वकर्माले यस्तो बजेट र कार्यक्रम हुनै नसक्ने बताउनुभयो ।

शेयर गर्नुहोस्: