काठमाडाैं । नेकपा एमालेका सांसद् नारायण प्रसाद खतिवडाले फोहोर व्यवस्थापनको नाममा नुवाकोटका जनतमाथि प्रहरी दमन भएकाे भन्दै आपत्ति जनाउनुभएकाे छ ।
बिहीबार बसेकाे प्रतिनिधि सभा बैठकको शून्य समयमा बोल्दै सांसद् खतिवडाले बञ्चरेडाँडामा फोहोर व्यवस्थापन गर्ने निहुँमा नुवाकोटे जनतामाथि प्रहरी दमन भएकाे बताउनुभयाे ।
'यही जेठको २४ र २५ गते नुवाकोटको ककनी र धादिङको धुनिवेशीको बीचमा बञ्चरेडाँडामा फोहोर व्यवस्थापन गर्ने निहुँमा नुवाकोटे जनतामाथि प्रहरी दमन भएको छ, स्थानीय चुनावमा चुनाव चिन्ह रहेको लौरो अहिले नुवाकोटे जनताको टाउको र ढाडमा बजारिन पुगेको छ ।'
फाेहाेर व्यवस्थापनका नाममा १७ वर्ष अगाडिदेखि नुवाकोटमा वेथिती भएकाे भन्दै उहाँले त्यसकाे व्यवस्थापन गर्न सरकारकाे ध्यानाकर्षण गराउनुभयाे । खतिवडाले भन्नुभयाे -'स्थानीय जनताको जायज माग सुनेर त्यो पुरा गरेर फोहोर व्यवस्थापन गर्ने व्यवस्था होस्,सभामुखमार्फत सरकारकाे ध्यानाकर्षण गराउन चाहान्छु ।'
समयमै किसानलाई मल दिन पनि उहाँले सरकारकाे ध्यानाकर्षण गराउनुभयाे ।
