काठमाडाैं । नेकपा एमालेका सांसद् भीम रावलले गठबन्धन सरकारले परराष्ट्र नीति विपरित गतिविधि गरिरहेकाे बताउनुभएकाे छ ।
बिहीबार बसेकाे प्रतिनिधि सभा बैठकमा खर्च कटाैतीकाे प्रस्ताव पेस गर्दै सांसद् रावलले परराष्ट्र नीतिमा सरकारले दाेहाेराे चरित्र देखाएकाे बताउनुभयाे । लिम्पियाधुरा,लिपुलेक र कालापानी हाम्राे भूमि हाे भनेर नक्सा पास भइसकेकाे अवस्थामा सरकारले त्यसलाई अनदेखा गरेकाे उहाँकाे भनाइ छ ।
भारत भ्रमणका क्रममा प्रधानमन्त्री शेरबहादुर देउवाले सीमा सुरक्षाकाे कुरा गर्न नसक्नु विडम्वना रहेकाे सांसद् रावलले बताउनुभयाे । भारतसँग थरथर काम्ने सरकारले अमेरिकासँग साँढगाँढ गरेकाे रावलले बताउनुभयाे । राष्ट्रिय सुरक्षा नीति भन्नासाथ सरकार तर्सिने गरेकाे भन्दै उहाँले लिम्पियाधुरा, लिपुलेक र कालापानी भारतको अतिक्रमणमा पर्दा समेत सरकार चुइँक्क बोल्न नसकेकाेमा आपत्ति जनाउनुभयाे ।
'हामीले केही समय अगाडि राष्टिय सुरक्षा नीतिकाे कुरा गर्याैं, राजपत्रमा प्रकाशित भयो, राष्ट्रिय सुरक्षा नीत भन्नासाथ यो सरकार तर्सिन्छ कि क्या हो,हुन त लिम्पियाधुरा,लिपुलेक र कालापानी र लिपुलेक भारतीय अतिक्रमणमा पर्दा सरकार चुइँक्क बोल्दैन, सरकार थर्थर कामेर छ, जनताबाट निर्वाचित हूँ भन्ने व्यक्ति प्रधानमन्त्री थरथर कामेर राष्ट्रियता स्वाधिनता र स्वतन्त्रताकाे रक्षा हुन्छ ?'
एकातिर सीमा सुरक्षामा पछि हट्ने र अर्काेतर्फ अमेरिकी सैनिक तैनाथी सम्झौता अगाडि बढाउने दिशामा सरकार अगाडि बढेकाे सांसद् रावलले बताउनुभयाे । 'हामीले दिनदिनै सुनिरहेका छौँ, अमेरिका सेनाका प्रमुख आउने रे यहाँ सेना प्रमुख अमेरिका जाने रे के हुँदैछ ? रक्षा मन्त्रीजीसमेत रहनुभएको प्रधानमन्त्रीलाई सोध्न चाहन्छु'- रावलले भन्नुभयाे ।
स्वतन्त्र परराष्ट्र नीति उल्लंघन गरे देशविरुद्धको अपराध हुने चेतावनी दिँदै उहाँले राष्ट्रियताविरुद्ध जानेहरुलाई देशभक्त नेपालीले माफी नदिने बताउनुभयाे ।
