काठमाडौं । सांसद् हृदयेश त्रिपाठीले थारु र मधेसीमाथि प्रहरीले ज्यादती गरेकाे बताउनुभएकाे छ ।
बिहीबार बसेकाे प्रतिनिधि सभा बैठककाे शून्य समयमा बर्दिया घटनाबारे बाेल्दै सांसद् त्रिपाठीले प्रहरीले थारु र मधेसीमाथि ज्यादती गरेकाे आराेप लगाउनुभयाे । बर्दियामा बाघबाट बचाउन माग गर्नेलाई प्रहरीले गोली हानेर मारेकाे उहाँले बताउनुभयाे ।
'बर्दियामा बाघबाट बचाउन आग्रह गर्दा पुलिस रुपी राक्षसबाट मृत्यु भयाे, थारु र मधेसीलाई हेर्नेवित्तिकै गोली हान्ने प्रवृत्ति कहिले अन्त्य हुने हो ? हाम्रा पुलिस प्रशासनले थारु र मधेशीलाई हेर्ने वित्तिकै गोली नै हान्नु पर्ने जुन प्रवृत्ति छ, यो घृणा कहिले अन्त्य हुने ? यस्तै प्रति घृणा अर्कोतर्फ हुन थाल्यो भने हामी कहाँ पुगिने हो ? यो साह्रै चिन्ताको विषय छ'- त्रिपाठीले भन्नुभयाे ।
बर्दियामा बाघको आक्रमणबाट स्थानीय घाइते भएपछि स्थानीयबासी आन्दोलनमा उत्रिएका थिए । आन्दाेलनका क्रममा प्रहरीको गोली लागेर नविना थारुको ज्यान गएकाे थियाे । त्रिपाठीले साेही घटनाकाे विराेध गर्नुभएकाे छ ।
पुलिसले गरेको ज्यादतीको चित्र लाल आयोगको प्रतिवेदनमा समेत रहेकाे भन्दै उहाँले त्यसलाई सरकारले सार्वजनिक गर्न नचाहेकाे बताउनुभयाे । घुमुवा प्रहरीले विचौलिया र दलालको काम गरेको भन्दै उनीहरुलाई हटाउन माग गर्नुभयाे । 'यो घुमुवा भन्ने प्रहरी व्यवस्था कुन वैज्ञानिकले गरेको हो ? यिनले भष्टाचारकालागि विचौलिया र दलालको काम गर्दो रहेछन्, प्रमुख आइजीपीलाई भन्न चाहान्छु त्यसलाई हटाइदिनुपर्यो'- त्रिपाठीकाे माग छ ।
आईटी क्षेत्रमा हुने घोटालाको एउटा उदाहरण इम्बोस्ड नम्बर प्लेट भएको समेत सांसद् त्रिपाठीले बताउनुभयाे । हज कमिटीका नाममा पार्टीका नेता-कार्यकर्ता पाेस्ने काम भएकाे पनि उहाँले बताउनुभयाे ।
