काठमाडौं । किसानले खेती लगाउने बेलामा रासायनिक मलको अभाव भएको कुरालाई नेकपा एमालेले प्रतिनिधि सभामा सार्वजनिक महत्त्वको विषय बनाएको छ । सोमबारको प्रतिनिधि सभा बैठकमा एमालेले नियमित छलफलको कार्यसूची स्थगित गर्दै मल अभावको विषयमा छलफल गर्न अत्यन्त जरुरी सार्वजनिक महत्त्वको प्रस्ताव ल्याएको हो । प्रतिनिधि सभामा प्रमुख सचेतक विशाल भट्टराई ले राख्नु भएको प्रस्तावलाई बैठकले सर्वसम्मतले पारित गरेपछि मल अभावको विषयमा छलफल भएको हो । छलफलमा बोल्दै भट्टराईले मल कहिलेसम्म आउँछ भन्दै प्रश्न गर्नुभयो । उहाँले कृषि उत्पादन वृद्धिको नीति कार्यक्रम बनाउने सरकारले मल नल्याएर किसानलाई धरधरी रुवाएको बताउनुभयो । भट्टराईले मल खोज्न जानुभएका कृषि मन्त्री के गरेर फर्कनुभयो ? भन्दै प्रश्न गर्नुभयो । बैठकमा बोल्दै सांसद राजेन्द्र कुमार राईले मल कहाँ आइपुग्यो ? कहिले आइपुग्छ ? किसानले कहिले पाउँछ भन्दै प्रश्न गर्नुभयो । अर्का सांसद नारायण खतिवडाले मकैमा मल हाल्ने बेला बितिसक्दा पनि किसानले मल नपाएको बताउनुभयो । धानको लागि पनि किसानले मल हाल्न नपाउने अवस्था आएको भन्दै उहाँले सरकारको ध्यानाकर्षण गराउनुभयो । झपडबहादुर रावलले यति बेला कृषकले सरकार खोजिरहेको बताउनुभयो । उहाँले कृषि मन्त्री जनताको जल्दो बस्दो समस्यासँग बेखबर रहेको बताउनुभयो । सांसद गंगा चौधरीले मल कहिले आउँछ मन्त्रीज्यू, मल कहिले दिन्छौँ सरकार भनेर किसानले माग गरिरहेको बताउनुभयो । देशमा ४ लाख मेट्रिकटन मल आवश्यक रहेको अवस्थामा सरकारले त्यसको कुनै जोहो गर्न नसकेको उहाँले टिप्पणी गर्नुभयो । चौधरीले किसानलाई मल दिन नसक्ने सरकारलाई भारतबाट खेतमा राख्न टाउकोमा मलको बोरा लिएर आउने किसानको मल नखोस्न आग्रह गर्नुभयो । सांसद रेखाकुमारीले महँगो मूल्यमा भारतबाट साइकलमा मल ल्याउने किसानको मल खोस्ने काम तत्काल रोक्न आग्रह गर्नुभयो । उहाँले मलको लागि किन सरकारले गम्भीर भएर नसोचेको भन्दै सरकारको आलोचना गर्नुभयो । सांसद यज्ञ सुनुवारले नेपालको जनताको कुनै आवश्यकता सम्बोधन गर्न नसक्ने सरकार बिचौलियाको चङ्गुलमा फसेको बताउनुभयो । उहाँले सरकार के को लागि ? भन्दै प्रश्न गर्नुभयो । सांसद नारायणप्रसाद मरासैनीले राज्यको अति प्राथमिकतामा परेको कृषि क्षेत्रमा सरकार गम्भीर नभएको बताउनुभयो । उत्पादन बढाउन अति महत्पूर्ण मल सरकारले व्यवस्था गर्न नसकेको उहाँले टिप्पणी गर्नुभयो । सरकार अहिले लाजमर्दो अवस्थामा रहेको उहाँले बताउनुभयो ।
सांसद पवित्रा निरौला खरेलले सरकारले मलको व्यवस्था गर्न नसक्दा कृषि प्रधान देश भन्न लाज लाग्दो अवस्था आएको बताउनुभयो । बाली लगाउने समयमा किसानले मल नपाउनु दुर्भाग्यपूर्ण रहेको उहाँको भनाई छ ।
