नारदमुनि रानाको सरकारलाई प्रश्न : किसानलाई मल नदिने अनि ठुला कुरा गर्ने ?

काठमाडौं । प्रतिनिधि सभा सदस्य नारदमुनि रानाले अस्तव्यस्त र अव्यवस्थाको सिकार भएको देशको रूपमा नेपाल चिनिँदै गएको बताउनुभएको छ । सोमबार प्रतिनिधि सभा बैठकमा बोल्दै कुनै बेला बुद्ध जन्मिएको देश, सगरमाथाको देशको रूपमा चिनिने नेपाल अहिले समयमा किसानले मल नपाउने र विद्यार्थीले पुस्तक नपाउने देशको रूपमा परिचित भएको बताउनुभयो । जनादेशबाट नबनेकोले सरकार जनता प्रति जिम्मेवार नभएको उहाँले आरोप लगाउनुभयो । बैठकमा बोल्दै रानाले साझा सरोकारको विषयमा समेत प्रतिनिधि सभामा साझा धारणा बन्न नसकेको उहाँले गुनासो गर्नुभयो । किसानको बारेमा बोल्दा विभिन्न क्रिया प्रतिक्रिया आउने गरेको उहाँले बताउनुभयो । ‘के हामीले साँच्चै किसानको हित गरिरहेका छौँ त ?’उहाँले ‘जुन सरकारले आफ्ना किसानलाई समय मल दिन सक्दैन, विद्यार्थीलाई किताब दिन सक्दैन, सिँचाइको आवश्यक व्यवस्था गर्न सक्दैन, त्यसले ठुला कुरा गर्न मिल्छ ?’, उहाँले प्रश्न गर्नुभयो ।