भन्सार दर र कर परिवर्तन गरी अर्थमन्त्रीको नियमित कमिसन लिने मेसो : महेश बस्नेत

काठमाडौं । प्रतिनिधि सभा सदस्य महेश बस्नेतले सरकारको ध्यान जनताको समस्या समाधान गर्न होइन प्रतिपक्षलाई गाली गर्न केन्द्रित भएको बताउनुभएको छ । सोमबार प्रतिनिधि सभा बैठकमा बोल्दै सांसद बस्नेले जनताका समस्या एकातिर छन् तर सरकार अर्कोतिर लागेको बताउनुभयो । उहाँले किसानलाई मलको अभाव, विद्यार्थीलाई किताबको अभाव, काठमाडौँको फोहोर उठ्न नसकेको अवस्थामा मन्त्रीहरू विदेश भ्रमणमा हतारिएको बताउनुभयो । प्रधानमन्त्री अमेरिकाको विवादित भ्रमणमा निस्किन लागेको भन्दै उहाँले आलोचना गर्नुभयो । ‘नीतिगत सुधारदेखि लिएर मन्त्रीहरूको व्यवहारमा किन सुधार हुन सकेको छैन ?’ उहाँले प्रश्न गर्नुभयो । सांसद बस्नेतले बजेट घोषणाको अघिल्लो राति अर्थमन्त्रीले एक जना भूपू सुब्बा र विज्ञ भनिएका अर्का एक व्यक्ती ल्याएर भन्सार दर रेट र करमा गडबडी गरेको उहाँले बताउनुभयो । अर्थमन्त्रीले भन्सार दर र कर परिवर्तन गरी नियमित कमिसनको मेसो मिलाएको उहाँको भनाइ छ । मासिक ३० करोड बढी विद्युत् खपत गर्ने सिमेन्ट र रड कारखानामा १५ प्रतिशत विद्युतमा छुट गर्ने निर्णय गरेर अर्थमन्त्रीले नियमित ठूलो रकम कमिसन लिने गरेको उहाँले उदाहरण प्रस्तुत गर्नुभयो ।