प्रतिनिधि सभामा एमालेले माग्यो अर्थ मन्त्रीको राजीनामा, अर्थ मन्त्रालय माथिको छलफलमा भाग लिन अस्वीकार | Sunrise Khabar

काठमाडौं । अर्थ मन्त्री जनार्दन शर्माको राजीनामा माग गर्दै नेकपा एमालेले प्रतिनिधि सभा बैठकमा विरोध जनाएको छ । बजेट बनाउने बेलामा अनधिकृत व्यक्तिलाई अर्थमन्त्रीले प्रवेश गराएको विषयलाई लिएर एमालेले मंगलबार प्रतिनिधि सभामा विरोध जनाएको हो । मंगलबार बैठक सुरु हुने बित्तिकै एमाले सांसदले उठेर अप्जेक्सन जनाएका थिए । त्यस पछि सांसद सुरेन्द्र पाण्डेलाई सभामुखले बोल्ने समय दिनुभएको थियो । पूर्व अर्थमन्त्री समेत रहनुभएका सांसद पाण्डेले प्रमुख प्रतिपक्षी दलले गम्भीरतापूर्वक प्रश्न खडा गर्दा पनि अर्थमन्त्रीले संसदमा कुनै जानकारी नदिएको भन्दै आपत्ति जनाउनुभयो । करका दर तलमाथि भए भन्ने बारेमा सांसदले गम्भीर चासो व्यक्त गरेका उहाँले बताउनुभयो । ‘यति गम्भीर प्रश्न उठेपछि अर्थमन्त्री त्यो पदमा बस्न लायक हुनुहुन्छ ?’ उहाँले प्रश्न गर्नुभयो । यस विषयमा प्रधानमन्त्रीको समेत पाण्डेले ध्यानाकर्षण गराउनुभयो । यसको जवाफ संसद्लाई चाहिने उहाँले बताउनुभयो । यो अर्थ मन्त्रीको विष मात्रै हो कि प्रधानमन्त्रीको पनि विषय हो ? भन्दै उहाँले प्रश्न गर्नुभयो । ‘मन्त्रीले नैतिक हिसाबले त्यो पदमा बस्न हुँदैन’, उहाँले भन्नुभयो । पाण्डेले बोलिसकेपछि सभामुखले सो विषयमा आफ्नो ध्यानाकर्षण भएको बताउँदै बैठकको कारबाही अघि बढाउन खोज्दा एमाले सांसदले उठेरै विरोध जनाउनुभएको थियो । त्यसपछि सभामुखले पुनः प्रमुख सचेतक विशाल भट्टराईलाई बोल्न समय दिनुभएको थियो । भट्टराईले यति गम्भीर विषयमा प्रमुख प्रतिपक्षी दलले ध्यानाकर्षण गराएपछि अर्थ मन्त्रालयको विषयमा छलफल गर्न नसकिने बताउनुभयो । उहाँले अन्य मन्त्रालयको विषयमा छलफल गर्न सकिने भए पनि अर्थ मन्त्रालयको बारेमा छलफल हुन नसक्ने बताउनुभयो । यस विषमा पनि आफ्नो ध्यानाकर्षण भएको सभामुखले बताएपछि अन्य विषयको छलफलमा बैठक प्रवेश गरेको छ ।

शेयर गर्नुहोस्: