काठमाडाैं । नेकपा एमालेले अर्थमन्त्री जनार्दन शर्माकाे राजीनामा मागेकाे छ ।
बजेट निर्माणका क्रममा अनाधिकृत व्यक्तिले भनेको आधारमा करकाे दर हेरफेर गरिएको आराेप लागेकाे भन्दै एमालेले अर्थमन्त्रीकाे राजीनामा मागेकाे हाे । एमालेले अर्थमन्त्रीमाथि छानबिन गर्न संसदीय समिति बनाउन र अर्थ मन्त्रालयको जेठ १४ गते रातिको सीसीटीभी फुटेज ल्याउन पनि माग गरेकाे छ ।
मंगलबार बसेकाे प्रतिनिधि सभा बैठकमा अर्थमन्त्री शर्माले अर्थ मन्त्रालयकाे बजेटमाथि उठेका प्रश्नकाे जवाफ दिएलगत्तै एमाले सांसद्ले उठेर विराेध जनाए । लगत्तै सभामुख अग्निप्रसाद सापकाेटाले एमाले सचेतक विशाल भट्टराईलाई बाेल्न समय दिनुभयाे ।
बजेट निर्माण गर्ने क्रममा अर्थमन्त्रीले करका दर हेरफेर गर्न अमुक मान्छे पठाएको भन्दै उहाँले संसदीय छानबिन समिति गठन गर्न माग गर्नुभयाे । प्रमुख सचेतक भट्टराईले समिति गठन नभएसम्म संसदको अवरोध कायम रहने बताउनुभयाे । भट्टराईले जेठ १४ गते रातिको अर्थमन्त्रालयको सीसीटीभी फुटेज ल्याउन चुनाैती दिनुभयाे ।
भट्टराईले बाेलेपछि पनि एमाले सांसद्ले उठेर विराेध गरिरहे । सभामुखले स्पष्टिकरणमा भाग लिन एमाले सांसद्लाई आग्रह गर्नुभयाे । अर्थमन्त्रीले स्पष्टिकरण साेध्न पाउने व्यवस्था नियमावलीमै रहेकाे भन्दै सभामुखले आग्रह गर्नुभयाे । एमाले सांसद्ले विराेध जनाइरहे । त्यसपछि सभामुख सापकोटाले असार १ गते बिहान ११ बजेसम्मका लागि बैठक स्थगित गर्नुभएकाे छ ।
यसअघि प्रतिनिधि सभा बैठककाे सुरुमै एमाले सांसद् एवं पूर्व अर्थमन्त्री सुरेन्द्र पाण्डेले यस्ताे गम्भीर विषयमा आराेप लागेपछि अर्थमन्त्री पदमा बस्न उचित नहुने भन्दै राजीनामाकाे माग गर्नुभएकाे थियाे । लगत्तै प्रमुख सचेतक भट्टराईले बाेल्दै अर्थमन्त्रीले जवाफ दिने कार्यक्रम कार्यसूचीबाट हटाउन माग गर्नुभएकाे थियाे । अर्थमन्त्रीकाे जवाफमा भाग नलिने घाेषणा गर्नुभएकाे थियाे ।
