काठमाडाैं । प्रतिनिधि सभाकाे बैठक आज पनि बस्दैछ ।
संघीय संसद् भवन नयाँ बानेश्वरमा बिहान ११ बजे बस्ने बैठकमा ११ जना मन्त्रीले बजेटमाथि उठेका प्रश्नको जवाफ दिने कार्यसूची छ । कानुन, न्याय तथा संसदीय मामिला, शहरी विकास, उद्योग, वाणिज्य तथा आपूर्ति, संस्कृति, पर्यटन तथा नागरिक उड्डयन, भौतिक पूर्वाधार तथा यातायात, अर्थ, स्वास्थ्य तथा जनसंख्या, संघीय मामिला तथा सामान्य प्रशासन, सञ्चार तथा सूचना प्रविधि र गृह मन्त्रालयका मन्त्रीले सम्बन्धित मन्त्रालयमा उठेका प्रश्नकाे जवाफ दिनेछन् ।
रक्षा मन्त्रालय, राष्ट्रिय योजना आयोगको सचिवालय, प्रधानमन्त्री तथा मन्त्रिपरिषद्को कार्यालय, राष्ट्रपतिको कार्यालय एवं उपराष्ट्रपतिको कार्यालयका लागि विनियाेजित बजेटमाथि उठेका प्रश्नकाे सम्बन्धित मन्त्रीले जवाफ दिने कार्यसूची पनि रहेकाे संसद् सचिवालयले जनाएकाे छ ।
सांसद प्रेम सुवाल, दुर्गा पौडेल, शिवमाया तुम्वाहाङफे, जगतबहादुर सुनार, घनश्याम खतिवडा, गोकर्ण विष्ट, जुली कुमारी महतो, आशा कुमारी बिक, नरबहादुर धामी, भानुभक्त ढाकाल, वसन्त कुमार नेम्वाङ, पद्मा आर्याल, बिमला बिक, लालबाबु पण्डित, गोकुल बास्कोटा, यज्ञराज सुनुवार, सूर्य पाठक, भीम रावल, नवराज शिलवाल, दीपक प्रकाश भट्ट, खगराज अधिकारी, कृष्णभक्त पोखरेल, शेरबहादुर तामाङले राखेको खर्च कटौतीको प्रस्तावलाई सभामुख अग्निप्रसाद सापकोटाले निर्णयार्थ प्रस्तुत गर्ने कार्यसूची पनि छ ।
त्यसपछि विनियोजन विधेयक, २०७९ का दफाहरुलाई निर्णयार्थ प्रस्तुत गरिनेछ । अर्थ मन्त्री जनार्दन शर्माले 'विनियोजन विधेयक, २०७९ लाई पारित गरियोस्' भनी प्रस्ताव प्रस्तुत गर्नुहनुेछ । उहाँले 'आर्थिक विधेयक, २०७९ माथि विचार गरियोस्' भन्ने प्रस्ताव पनि प्रस्तुत गर्नुहुनेछ ।
'आर्थिक विधेयक, २०७९' माथि दफावार छलफलको लागि दिन तोक्ने कार्यसूची पनि छ । 'राष्ट्र ऋण उठाउने विधेयक, २०७९ माथि विचार गरियोस्' र ऋण तथा जमानत (पच्चीसौं संशोधन) विधेयक, २०७९ माथि विचार गरियोस्' भनी प्रस्ताव प्रस्तुत गर्नुहुने कार्यसूची छ ।
