काठमाडौं । नेकपा एमालेले नेपालको परराष्ट्र नीति प्रति सरकार गम्भीर नभएको भन्दै प्रतिनिधि सभामा आपत्ति जनाएको छ ।
अमेरिकासँग नेपालले गर्न लागेको पछिल्लो एसपीपी सम्झौताले सिङ्गो नेपाली समाज चिन्तित भएको एमालेले जनाएको छ । बुधबार प्रतिनिधि सभा बैठक सुरु हुने बित्तिकै एमाले सांसद प्रदीप ज्ञवालीले नेपालको सार्वभौमसत्ता, स्वतन्त्रता र स्वाभिमान जोगाउनु प्रत्येक नेपालीको दायित्व भएको बताउनुभयो । पछिल्लो समय नेपालले अमेरिकासँग हस्ताक्षर गर्न लागेको भनी सार्वजनिक भएको डकुमेन्टले नेपाली सेनालाई अमेरिकाको एउटा स्टेटको नेशनल गार्डको समकक्षी बनाउन खोजेको भन्दै उहाँले आलोचना गर्नुभयो ।
नेपालमा संयुक्त राष्ट्र सङ्घको आह्वानमा शान्ति स्थापनको लागि मात्र काम गर्दै आएको स्मरण गराउँदै उहाँले त्यस विपरीत नेपाली सेना परिचालन हुन नसक्ने उहाँले बताउनुभयो । सरकारले नेपालमा अमेरिकी सेना भित्र्याएर चीनको सिमानामा क्याम्प खडा गर्न दिन लागेको उहाँले बताउनुभयो । भू-राजनीतिक द्वन्द्वमा मुलुकलाई धकेल्न खोजेर सरकारले के गर्न खोजेको रु, नेपाललाई भू राजनीतिक द्वन्द्वमा धकेल्ने काम कुनै पनि हालतमा स्वीकार्य हुँदैन’, ज्ञवालीले भन्नुभयो ।
कुनै पनि राष्ट्रको अन्तर्राष्ट्रिय चासोको विषय हुनसक्ने ज्ञवालीले बताउनुभयो । तर ती चासोका विषयमा नेपालले साथ दिन सक्दैन भनेर भन्न नसक्नेलाई सरकारमा बस्ने हैसियत नहुने उहाँले बताउनुभयो ।
