काठमाडाैं । नेकपा एमालेका सांसद् याेगेश भट्टराईले स्वास्थ्य तथा जनसंख्या मन्त्री विराेध खतिवडाकाे अभिव्यक्तिप्रति कडा आपत्ति जनाउनुभएकाे छ ।
मन्त्रालयका लागि विनियोजित बजेटमाथि सांसद्ले उठाएका प्रश्नको बुधबार प्रतिनिधि सभामा जवाफ दिने क्रममा मन्त्री खतिवडाले एमाले अध्यक्ष ओलीप्रति लक्षित गर्दै आफू क्वीन्टल साबित भएकाे बताउनुभएकाे थियाे ।
साेही विषयमा एमाले सांसद् भट्टराईले आपत्ति जनाउनुभएकाे हाे । उहाँले भन्नुभयाे - 'उहाँ (विराेध खतिवडा) पुरानाे सांसद् हाे, उहाँबाट शिष्टता र मर्यादाकाे भाषाकाे अपेक्षा गरेकाे थिएँ, उहाँले ठिक विपरित प्रतिनिधि सभालाई कुस्ती खेल्ने मैदान ठानेर जवाफ दिनुभएकाे छ, याे प्रतिनिधि सभा हाे, कुस्ती खेल्ने मैदान हाेइन, तपाईं क्विन्टल हुनुहुन्छ हाेला,किलाेवाला सांसद्हरु तपाईंसँग झगडा गर्न चाहेका हाेइनन्,तपाईंकाे जवाफ चाहेका हाैं ।'
खतिवडाले आफूलाई जाेडेर एउटा कहानी सुनाउँदै क्वीन्टलकाे कुरा गर्नुभएकाे थियाे । ‘मेरो हेटौंडामा एउटा साथी थियो, मेरो जिउ देखिहाल्नुभयो, क्वीन्टल माथि पुगेको छ, ऊ अलि क्वीन्टल पुगिसकेको छैन, किलो मै छ, उसले जहिले देखे पनि मलाई तेरो फोक्से मासु हो, तँ क्वीन्टल छैनस्, तँ किलो नै होस्, मचाहिँ हो क्वीन्टल भन्थ्यो, वैशाख ३० मा फेरि उसँग भेट भयाे, दोकानमा तौल मेसिन रहेछ, मैले पनि जोखेँ, उसले पनि जोख्यो, आखिर उसले आफूलाई क्वीन्टल भनेको थियो, किलो साबित भयाे, क्वीन्टल मै साबित भएँ, कहिलेकाहीँ यस्तो पनि हुन्छ'-खतिवडाकाे भनाइ थियाे ।
स्वास्थ्य बीमा कार्यक्रम कम्पनीलाई दिने कुरा बजेट वक्तव्यबाट हटे नहटेकाे स्पष्ट पार्न पनि सांसद् भट्टराईले माग गर्नुभयाे । उहाँले भन्नुभयाे - 'हामीले बीमा,बीमा,बीमा... भनेका छाैं तपाईंले भन्नुभयाे - त्यहि केटी चाहिन्छ, तपाईंले जतिसुकै भनेपनि,अर्थमन्त्रीकाे बजेट वक्तव्यबाट बीमाकाे काम कम्पनीबाट हुन्छ भन्ने हट्याे कि हटेन जवाफ दिनुस्,हामीले खाेजेकाे त्याे हाे ।'
