काठमाडौं । स्वास्थ्य तथा जनसंख्या मन्त्रालय विरोध खतिवडाले २४ लाख खोप हराएकाे भन्ने विषयमा मन्त्रालयको वेबसाइट हेर्न आग्रह गर्नुभएकाे छ ।
मन्त्रालयका लागि विनियोजित बजेटमाथि सांसद्ले उठाएका प्रश्नको बुधबार प्रतिनिधि सभामा जवाफ दिने क्रममा मन्त्री खतिवडाले मन्त्रालयकाे वेवासाइटमा सबै विवरण भएकाे बताउनुभयाे । उहाँले भन्नुभयाे - 'स्वास्थ्य मन्त्रालयको वेबसाइटमा कुन देशबाट के नामको खोप कति आयो ? कुन मितिमा आयो ? त्याे खाेप काठमाडाैंमा आएकाे छ,विराटनगर र नेपालगञ्ज गएको छैन, काठमाडौंबाट कुन नाम गरेकाे खाेप कुन-कुन प्रदेशमा कति गयो ? प्रदेशले कुनकुन जिल्लालाई कुन नामकाे खोप बाड्यो ? त्याे पनि वेबसाइटमा छ ।'
अहिलेसम्म नेपालमा ५ करोड ३३ लाख खोप आएकोमा ४ करोड ८७ लाख प्रयोग भइसकेको भन्दै उहाँले अझै ४६ लाख ४७ हजार डोज खोप सरकारसँग स्टक रहेको बताउनुभयाे । २४ लाख खाेप घोटाला भएकाे भए पुष्टि गर्न मन्त्री खतिवडाले चुनाैती दिनुभयाे । उहाँले भन्नुभयाे - 'यदि मैले २४ लाख खाेप घाेटाला गरेकाे हाे भने,नेपालीमा धेरै उखान छन्, चोरको कुरा चोरले नै देख्छ, वदमासले वदमासै देख्छ, सर्पको सर्पको खुट्टा सर्पलाई नै देख्छ, भाषा आफैं जाेडेर,कुनै पनि प्रदेश र जिल्लामा गएर याे विराेध खतिवडाले राखेकाे डाटा ठिक हाे ? तपाईंहरुले यति पाउनुभएकाे हाे ? भनेर साेध्नुपर्याे,यदि हाे भन्याे भने मैले बाेलेकाे ठिक भयाे,हाे भन्याे भने आराेप लागेका मानिसहरु झुटाे सावित हुन्छन् ।'
आफू आराेपित र झुठाे सावित हुन आतुर रहेकाे बताउँदै उहाँले भन्नुभयाे - 'कृपया यति गर्दिनुहोला ।' ५० लाख डाेज खाेप डम्पीङ गरेर नयाँ खाेप किनेर कमिशन खाने खेल भएकाे भनेर आराेप लगाइएकाे मन्त्री खतिवडाले बताउनुभयाे । यस्ता कुरामा शंका गर्न नहुने उहाँकाे भनाइ छ ।
