रुपन्देही । प्रमुख प्रतिपक्षी दलको अवरोधपछि लुम्बिनी प्रदेशसभाको बैठक स्थगित भएको छ ।
लुम्बिनी प्रदेश सरकारले आज प्रदेशसभामा बजेट प्रस्तुत गर्ने तयारी गरिरहँदा प्रतिपक्षी दल नेकपा (एमाले) ले लुम्बिनी प्रदेश सरकारका स्वास्थ्य राज्यमन्त्री विमला वलीको घटनाको विषयलाई लिएर अवरोध जनाएको हो ।
बैठकको सुरुमै एमाले संसदीय दलका प्रमुख सचेतक भूमिश्वर ढकालले राज्यमन्त्री वलीले महिला र बालिकामाथि गरेको दुव्र्यवहारको घटनामा सरकारको आधिकारिक धारणा सार्वजनिक गर्न माग गर्दै बैठक चल्न नदिने घोषणा गर्नुभयो ।
ढकालले दाङको तुलसीपुरस्थित मीना बस्नेतको घरमा पसेर राज्यमन्त्री वलीले बस्नेत तथा उहाँकी छोरीमाथि गरेको दुव्र्यवहारको घटनाले प्रदेशवासीको शिर निहुराएको भन्दै सरकारको स्पष्ट धारणा आउनुपर्ने बताउनुभयो । 'एउटा महिलामाथि जुन खालको व्यवहार मन्त्रीबाट भयो यसले हामीलाई लज्जित बनाएको छ । यसबारे प्रदेश सरकारको प्रतिक्रिया नआउनु दुःखद् हो', उहाँले भन्नुभयो । प्रतिपक्षी दलको अवरोधपछि बैठक आधा घण्टाका लागि अहिले स्थगित भएको छ ।
राज्यमन्त्री वलीले मङ्गलबार तुलसीपुर निवासी बस्नेत र उहाँकी छोरीमाथि कुटपिट गरेको भन्दै जिल्ला प्रहरी कार्यालय दाङमा उजुरी परेको छ । यसअघि आज बसेको एमाले संसदीय दलको बैठकले राज्यमन्त्री वलीले गरेको दुव्र्यवहारबारे प्रदेश सरकारको आधिकारिक धारणा नआउँदासम्म प्रदेशसभा बैठकमा अवरोध गर्ने निर्णय गरेको थियो ।
–रासस
