जनकपुरधाम । मधेस प्रदेशसभाको बैठक अर्काे सूचना नहुञ्जेलसम्मको लागि स्थगित भएको छ ।
प्रदेशसभा सचिवालयले आज साँझ सूचना जारी गरी मधेस प्रदेशसभाको बैठक अर्काे सूचना नहुञ्जेलसम्मको लागि स्थगित भएको जानकारी दिएको छ ।
प्रदेशसभाको आजको बैठकमा मधेस प्रदेशका अर्थमन्त्री शैलेन्द्रप्रसाद साहले आगामी आर्थिक वर्ष ०७९/०८० को लागि बजेट प्रस्तुत गर्नुभएको थियो ।
प्रदेशसभामा बजेट प्रस्तुत भएसँगै सभामुख सरोजकुमार यादवले प्रदेशसभाको बैठक अर्काे सूचना नहुञ्जेलसम्मको लागि स्थगित भएको घोषणा गर्नुभयो ।
आजको बैठकमा अर्थमन्त्री साहले ४६ अर्ब ८८ करोड नौ लाख ९५ हजार रुपैयाँको बजेट सार्वजनिक गर्नुभयो ।
प्रस्तुत बजेटमा चालुतर्फ २१ अर्ब ७६ करोड ६७ लाख (४६.४४ प्रतिशत), पूँजीगततर्फ २५ अर्ब ८२ करोड २० लाख ८० हजार (५३.२१ प्रतिशत) र वित्तीय व्यवस्थापनतर्फ १६ करोड २४ लाख ५६ हजार रुपैयाँ (०.३५ प्रतिशत) बजेट विनियोजन गरेको उल्लेख छ ।
बजेटमा मधेस प्रदेशमा मुख्यमन्त्री किसान उत्थान कार्यक्रमका लागि १५ करोड रुपैयाँ बजेट विनियोजन गरिएको छ ।
कृषि क्षेत्रको विकासका लागि प्रादेशिक कृषि गुरुयोजना तयार पार्न ५० लाख रुपैयाँ र यस क्षेत्रलाई व्यवसायीकरण, यान्त्रिकीकरण गर्न १७ करोड ८२ लाख रुपैयाँ छुट्याइएको छ । पशु बिमा र कृषि सडकको निर्माण गर्न २८ करोड २० लाख रुपैयाँ बजेट विनियोजन गरिएको छ । कृषि ज्ञान केन्द्रलाई सात करोड २८ लाख रुपैयाँ बजेट छुट्याएको छ ।
त्यस्तै सःशर्त र समपूरक अनुदानका लागि तीन अर्ब ८७ करोड रुपैयाँ विनियोजन गरिएको छ । यो अनुदान स्थानीय तहलाई प्रदान गरिनेछ ।
स्थानीय तहलाई चालू आर्थिक वर्षमा दिएको अनुदानको खर्च प्रगतिअनुसार दिइने अर्थमन्त्री साहले बताउनुभयो ।
–रासस
