काठमाडौं । राष्ट्रिय सभा सदस्य वामदेव गौतमले प्रधानमन्त्री शेरबहादुर देउवा कसैले सहयाेग गर्छु भन्याे भने कुरै नबुझी हात थाप्न तयार हुने बताउनुभएकाे छ ।
शुक्रबार बसेकाे राष्ट्रिय सभा बैठककाे विशेष समयमा बाेल्दै सांसद् गाैतमले देउवाकाे चरित्र अरुले सहयोग गरे हात थाप्न तयार हुने खालको भएकाे बताउनुभयाे । एसपीपी आउने वित्तिकै सम्झौता गर्न समेत देउवा तयार भएकाे उहाँले बताउनुभयाे ।
'उहाँ देशको विकास हुन्छ भने के गर्नपर्छ, के-के गर्नुपर्छ सबै गर्ने भन्दिनुहुन्छ, कसैले सहयोग गर्छ हात थापिहाल्नुपर्छ, उहाँको चरित्र त्यस्तो हो र त्यसले उहाँलाई पनि धेरै नाेक्सान गरेकाे छ,राष्ट्रलाई पनि नाेक्सान गरेकाे छ,सम्भवतः कांग्रेसलाई पनि नोक्सान गरेकाे छ,एसपीपी आउनासाथ उहाँ तयार हुनुभयाे यसलाई स्वीकार गर्न'- गाैतमकाे भनाइ छ ।
प्रधानमन्त्रीकाे तर्फबाट गृहमन्त्री बालकृष्ण खाँडले एसपीपी लागू हुँदैन भनेपछि केही सन्ताेष हुने ठाउँ भएकाे बताउनुभयाे । यति महत्वपूर्ण विषयमा राष्ट्रलाई गुमराह राखेर सम्झाैता गर्ने तयारी त भएकै रहेछ नि प्रधानमन्त्री शेरबहादुर देउवाकाे नेतृत्वमा ।' यति गम्भीर विषयमा प्रधानमन्त्री देउवाले सदनबाट जवाफ दिनुपर्नेमा गृहमन्त्रीलाई पठाउनु उचित नभएकाे बताउनुभयाे । विदेश गएकाे भए अर्कै कुरा तर नेपालमै रहेका बेला प्रधानमन्त्रीले सदनकाे वेवास्ता गर्नु उचित नहुने बताउनुभयाे । प्रधानमन्त्रीले सदनमा आएर जवाफ दिनुपर्ने पनि उहाँले बताउनुभयाे ।
एमसीसी सम्झाैता आइपीएसकाे अंग भएकाे भन्दै उहाँले एमसीसीकाे व्याख्यात्मक घाेषण आफूहरुले नैतिक रुपमा मानेपनि अमेरिकाले नमान्ने दाबी गर्नुभयाे । एमसीसीपछि अमेरिकी स्टेट पार्टनरसिप प्रोग्राम (एसपीपी) आएकाे भन्दै उहाँले साे सम्झाैता नेपाललाई अमेरिकी सैन्य गठबन्धनकाे हिस्सा बनाउन ल्याइएकाे दाबी गर्नुभयाे ।
पक्ष-विपक्ष बहस र समाचारले एसपीपी सैन्य गठबन्धनकाे हिस्सा भएकाे प्रष्ट भएकाे भन्दै उहाँले कुनै पनि हालतमा नेपाललाई त्यसमा सामेल गराउन नहुने बताउनुभयाे । याे विषय नेपाली कांग्रेस,नेकपा एमाले अरु पार्टी र संसद्ले समेत सामेल गराउन नहुने बताउनुभएकाे बताउनुभयाे । परराष्ट्र मन्त्री डा.नारायण खड्काले एसपीपी गर्न खाेजेकाे हाे तर सैन्य गठबन्धन हाेइन भन्ने अभिव्यक्ति दिएकाे भन्दै गाैतमले सरकार याे सम्झाैता गर्न तयार रहेछ भन्ने देखिएकाे बताउनुभयाे ।
एसपीपी सम्झाैता जसले गरेपनि अघि बढाउने काम एमाले अध्यक्ष केपी शर्मा ओलीले गरेकाे गाैतमकाे आराेप छ । उहाँले एसपीपी सुशील कोइराला नेतृत्वको सरकारले गरेको हो भन्ने कुरा संसदमा आएपछि आफूले खोजीनीति गरेको र प्रधानमन्त्रीको रुपमा एमाले अध्यक्ष ओलीले नै सो प्रस्ताव अघि बढाएको पाइएको दाबी गर्नुभयाे ।
सुशील कोइरालाको सरकारमा सुरुदेखि अन्त्यसम्म आफू सँगै रहेकाे स्मरण समेत सांसद् गाैतमले गर्नुभयाे । 'सन्त नेता कृष्णप्रसाद भनिन्थ्यो मेरो नजरमा सुशील कोइराला हो, मैलै उहाँसँग कहिल्यै मत बझाइन र मसँग सल्लाह नभइ राष्ट्रिय र अन्तराष्ट्रिय महत्वका कुनै पनि निर्णय गर्नुभएन, जानकारी दिनुभएन, अहिले जब नेकपा एमालेका अध्यक्ष केपी ओलीले सम्झौता गर्नुभयो भन्ने कुरा उठेपछि सुशील कोइरालाले हो भनेको हुनाले म पनि त्यसमा संलग्न हुन्छु, म प्रधानमन्त्रीले गरेको हो म छैन भन्दिनँ, सरकारमा सामेल भइसकेपछि प्रधानमन्त्रीले गरेको काम र व्यक्त गरेका विचारसँग सहमत हुनुपर्छ, त्यसो भएर म माथि पनि आरोप लाग्न सक्छ भनेर मैले त्यससम्बन्धमा खोजिनीति गर्दा के-के भएको हो ? अस्ति मात्र एउटा पत्र आएको छ, र त्यो पत्रले प्रष्ट पारिदिएको छ कि यसको सुरुवात जसले गरेको भए पनि यसलाई अघि बढाउने काममा नेकपा एमालेका अध्यक्ष त्यसबेलाका प्रधानमन्त्री संलग्न हुनुहुन्छ'-गाैतमकाे दाबी छ ।
