गणेश पहाडीको प्रश्न : लोकतान्त्रिक गणतन्त्रात्मक मुलुकमा दल नचिन्ने अर्थमन्त्री को हो ? | Sunrise Khabar

काठमाडौं । अर्थ मन्त्रलालमा बजेट बनाउने बेलामा अनधिकृत मानिसलाई प्रवेश गराएको फुटेज एमाले मागेको विषयमा गैर जिम्मेवार रूपमा अर्थमन्त्री जनार्दन शर्मा प्रस्तुत भएको प्रति प्रतिनिधि सभा सदस्य गणेश पहाडीले आपत्ति जनाउनु भएको छ । सोमबार प्रतिनिधि सभा बैठकमा बोल्दै पहाडीले अर्थमन्त्रीलाई बहुदलीय व्यवस्थामा राजनीतिक दल नचिन्ने निरङ्कुश व्यक्ति भएको संज्ञा दिनुभयो । एमालेले अर्थ मन्त्रालयको फुटेज संसद्मा पेस गर्न माग गरेको प्रति मन्त्री शर्माले फुटेज माग्ने एमाले को हो ? उसले माग्ने बित्तिकै फुटेज किन दिने ? भन्दै एक टेलिभिजन संवादमा गैर जिम्मेवार हर्कत प्रस्तुत गर्नुभएको थियो । बैठकमा बोल्दै अर्थमन्त्रीको गैर जिम्मेवार र देश विरोधी कामको विरोधमा उत्रिएका अनेरास्ववियुका विद्यार्थी माथि प्रहरीले लाठी हानेर घाइते बनाएको प्रति गम्भीर आपत्ति जनाउनुभयो । वर्तमान सरकार शान्तिपूर्ण विरोधमा उत्रिन पाउने मानव अधिकारको विरुद्ध उत्रिएको पहाडीको टिप्पणी छ । पहाडीले अर्थमन्त्रीलाई नेकपा एमाले संसद्को सबैभन्दा ठुलो र प्रमुख प्रतिपक्षी दल हो भनेर चिन्न आग्रह गर्नुभयो । ‘लोकतन्त्रमा दल नचिन्ने, पञ्चायतकलामा दल चिनिँदैनथ्यो, निर्दलीयतमा दल चिनिँदैन थ्यो तर आज लोकतन्त्रमा गणतन्त्रात्मक मुलुकमा दल नचिन्ने अर्थमन्त्री चाहिँ को हो ?’ पहाडीले प्रश्न गर्नुभयो ।

शेयर गर्नुहोस्: