डलरको खेती गर्नेले नेपालमा द्वन्द्व समाधान गर्न दिएनन् : देवप्रकाश गुरुङ

काठमाडौं । प्रतिनिधि सभा सदस्य देवप्रकाश गुरुङले मानव अधिकारको नाममा डलर कमाउने संघ संस्थाले नेपालको द्वन्द्व व्यवस्थापनको काम गर्न नदिएको आरोप लगाउनुभएको छ । आइतबार प्रतिनिधि सभा बैठकमा बोल्दै गुरुङले गम्भीर प्रकृतिका अपराधका घटनका मुद्दा समेत आपसी सहमतिको आधारमा मेलमिलापबाट टुङ्ग्याउनु पर्ने बताउनुभयो । राष्ट्रिय मुद्दा हुँदा हुँदै पनि डलरको खेती गर्ने एनजीओ, आईएनजीओले नेपालीलाई मिल्न नदिएको उहाँले आरोप लगाउनुभयो । ‘शान्ति प्रक्रियालाई राष्ट्रिय स्वाधीनताको कोणबाट हेरिनु पर्छ’, गुरुङले भन्नुभयो । उहाँले द्वन्द्वको बेलाका सबै मुद्दा राष्ट्रियतासँग जोडिएका मुद्दा भएकोले निर्मम किसिमले निर्णय गर्नुपर्ने बताउनुभयो । यसो नहुँदा विदेश जान समेत समस्या भएको उहाँले गुनासो गर्नुभयो । अन्तर्राष्ट्रिय कानुन र मानव अधिकारको कुरा गरेर डलरको खेती गर्नेले मुलुकमा एकता हुन नदिने र समाजमा द्वन्द्व कायम नै राख्ने काम गरेको उहाँको आरोप छ । द्वन्द्व व्यवस्थापन गर्न नदिएर यसलाई दुरुपयोग गर्ने काम भएको उहाँले बताउनुभयो । मुलुकलाई सहज अवस्थामा दिन नजाने प्रवृत्ति राष्ट्र घातको प्रवृत्ति रहेको उहाँले बताउनुभयो । यदि यही अवस्था रहने हो भने राष्ट्रिय स्वाधीनता नै समाप्त हुने गुरुङले दाबी गर्नुभयो ।