काठमाडौं । बजेटसँग सम्बन्धित विभिन्न तीनवटा विधेयक राष्ट्रिय सभाबाट पारित भएका छन् ।
शुक्रबार बसेकाे राष्ट्रिय सभा बैठकले प्रमुख प्रतिपक्षी नेकपा एमालेकाे बहिष्कारबीच आर्थिक विधेयक २०७९, राष्ट्र ऋण उठाउने विधेयक, २०७९ र ऋण तथा जमानत (२५ औं संशोधन) विधेयक, २०७९ बहुमतले पारित गरेको हाे ।
राष्ट्रिय सभाबाट पारित तीनै विधेयक सन्देशसहित प्रतिनिधि सभा पठाइएको छ । राष्ट्रिय सभाले सन्देशसहित पठाएको विधेयक प्रतिनिधि सभाले पारित गर्नुपर्ने हुन्छ ।
त्यसअघि अर्थमन्त्री जनार्दन शर्माले तीनै विधेयकलाई मूल रुपमा नै सुझाव दिन पारित गरी प्रतिनिधि सभामा फिर्ता पठाइयोस भन्ने प्रस्ताव पेस गर्नुभएको थियो । बैठकमा अर्थमन्त्रीले ती विधेयक पेस गर्दा एमालेका सांसद्ले उठेर विराेध गरेका थिए ।
त्यसपछि राष्ट्रिय सभा अध्यक्ष गणेशप्रसाद तिमिल्सिनाले एमाले सांसद् भैरव सुन्दर श्रेष्ठलाई बाेल्न समय दिनुभएकाे थियाे ।
श्रेष्ठले बजेट निर्माणका क्रममा अर्थमन्त्री शर्माले अनधिकृत व्यक्तिलाई प्रवेश गराएकाे विषयमा निष्पक्ष छानबिन नभएसम्म आफूहरूको विरोध रहिरहने बताउनुभयाे । साे विषयमा सत्यतथ्य पत्ता लगाउन संसदीय छानबिन समिति गठन गर्न आफूहरुले माग रहेको र एमाले संसदीय दलको बैठकले साे माग पूरा नभएसम्म बैठकमा सहभागी नहुने निर्णय गरेकाले आफूहरूले बहिष्कार गरेको बताउनुभयाे । कार्यसूचीमा रहेको आर्थिक विधेयकसँग सम्बन्धित विषयको छलफलमा सहभागी नहुने उहाँले घाेषणा गर्नुभयाे । त्यसपछि एमाले सांसद्हरु बैठकस्थलबाट बाहिरिएका थिए ।
एमालेको बहिष्कारका बीच राष्ट्रियसभा अध्यक्ष गणेशप्रसाद तिमिल्सिनाले बैठकको कार्यसूची अगाडि बढाउनुभएकाे थियाे ।
