काठमाडौं । नेकपा एमालेका अध्यक्ष केपी शर्मा ओलीले सरकार जाेगाउने नाममा जे पनि गर्न पाइने छुट नभएकाे भन्दै कडा आपत्ति जनाउनुभएकाे छ ।
साेमबार बसेकाे प्रतनिधि सभा बैठकमा विशेष समय लिएर बाेल्दै अध्यक्ष ओलीले मन्त्रीहरुले गलत काम गर्दा पनि प्रधानमन्त्री शेरबहादुर देउवाले केही गर्न नसकेकाे भन्दै आपत्ति जनाउनुभयाे । अर्थ मन्त्रालयमा अनधिकृत व्यक्ति प्रवेश गराएर करका दर हेरफेर गरेकाे आराेप लागेका अर्थमन्त्रीलाई कारबाही नगरेकाेप्रति लक्षित गर्दै उहाँले आपत्ति जनाउनुभएकाे छ ।
'प्रधानमन्त्रीजी लाचार हुनुभएकाे हाे ?, केही गर्न नसक्ने अवस्थामा पुग्नुभएको हो जे भए पनि ? कि गठबन्धन जोगाएपछि पुग्छ, देश बर्बाद होस् जहाँसुकै पुगोस्, गठबन्धनमाथि धराप पर्छ एउटा मन्त्रीमाथि प्रश्न उठ्दा, यतिधेरै क्रियाकलाप हुँदाहुँदा सीसीटिभी फुटेज डिलिट गरियाे, डिलिट गर्न पाइन्छ ?'
दाेषी नभएकाे भए अर्थमन्त्री शर्मा छानबिनका लागि तयार हुनुपर्ने अध्यक्ष ओलीले बताउनुभयाे । 'आफ्नाे स्वच्छता प्रमाणित गर्ने कर्तव्य हुन्छ,डिलिट गर्ने हाेइन,कर्तव्य त प्रस्तुत गर्नुपर्थ्याे - आउनुस् फुटेज हेरौं, आउनुस् छानबिन गरौं मन्त्रीले यो भन्न सक्नुपर्थ्याे, तर एमाले माग्दैमा किन दिने भनेर ललकार्ने ? थिति चाहिँदैन ?'
यस्ता विषयमा छानबिन हुनैपर्ने भन्दै उहाँले संसदीय छानबिन समिति गठन गरेर सत्यतथ्य छानबिन गर्न माग गर्नुभयाे । 'यस विषयमा संसदीय छानबिन समिति बनाउनुपर्छ,मैले अन्धाधुन्द आराेप लगाउँ भनेकाे छैन,यस्ता विषयमा छानबिन हुनैपर्छ, याे विश्वमै नभएकाे यसरी बाहिरिया मान्छेहरु विचाैलियाहरु राखेर बजेट बनाउनेजस्ताे कुरा कल्पना नै गर्न सकिँदैन,यस्ताे कुरा हुँदा पनि राज्य एउटा थितिमा चल्नुपर्दैन ? सरकार थितिमा चल्नुपर्दैन ? मर्यादा हुँदैन ? याे भन्दा बढी राज्यकाे अर्थतन्त्र ध्वस्त पार्ने तमासा अरु के हुन सक्छ ? त्यसर्थ यसकाे छानबिन हुनुपर्छ,छानबिन गर्छु भनेर प्रधानमन्त्रीले कबुल गर्नुपर्छ ।'
जे पनि गर्न पाउँछन् भन्ने कुरा भनेपनि नभनेपनि माैन बस्न नमिल्ने अध्यक्ष ओलीले बताउनुभयाे । छानबिन भएपछि मन्त्री वा सरकार निर्दाेष भए कुरा क्लियर हुने पनि उहाँले बताउनुभयाे । यस्ता कुरा प्रधानमन्त्रीले नियन्त्रण गर्नुपर्ने भन्दै अध्यक्ष ओलीले यस्ता विषयमा काेही जवाफदेही नभए प्रधानमन्त्री जवाफदेही हुनुपर्ने बताउनुभयाे । उहाँले भन्नुभयाे - खै जवाफदेहीता ? खै उत्तरदायित्व ? )ओठे जवाफकाे कुरा हाेइन,प्रमाणसहितकाे कुरा आउनुपर्याे नि ।'
