काठमाडौं । नेपाली कांग्रेसका सांसद् गगन थापाले अर्थमन्त्री जनार्दन शर्माले राजीनामा दिनुपर्ने बताउनुभएकाे छ ।
प्रतिनिधि सभाको बैठकपछि साेमबार संघीय संसद् भवन परिसरमा सञ्चारकर्मीसँग कुरा गर्दै थापाले करका दर हेरफेर गरेकाे विषयमा गम्भीर प्रश्न उठेपछि अर्थमन्त्रीले तत्काल राजीनामा दिनुपर्ने बताउनुभयाे । संसद्भिभित्र र बाहिर प्रश्नहरु उठेपछि कि अर्थमन्त्रीले राजीनामा दिनुपर्ने कि प्रधानमन्त्री शेरबहादुर देउवाले एक्सन लिनुपर्ने उहाँले बताउनुभयाे ।
अर्थ मन्त्रालयको सिसिटिभी फुटेज मेटिएको विषय बाहिर आएपछि अर्थमन्त्रीमाथि झनै प्रश्न उठेको थापाकाे भनाइ छ । सीसीटिभी फुटेज कम्तिमा ३ महिना हटाउन नहुने प्रावधान रहेका बेला १३ दिनमै हटाइने कुरा पनि अझ गम्भीर भएकाे उहाँले बताउनुभयाे ।
करकाे दर किन हेरफेर गर्नुभएकाे भनेर आफूले अर्थमन्त्रीलाई साेधेकाे स्मरण गर्दै थापाले भन्नुभयाे - 'बीचमा अनधिकृत व्यक्ति पसेकाे भन्ने प्रश्न उठ्याे,उहाँले हाेइन भन्नुभयाे,अर्थ मन्त्रालयले सीसीटिभी फुटेजकाे अवधि १३ दिन भनेपछि प्रधानमन्त्री तत्काल एक्सनमा जानुपर्छ, यत्राे विषय संसद्मा उठ्याे,बाहिर उठ्याे, हो-होइन मलाई थाहा छैन तर यो विषय उठिसकेपछि मैले बुझेको, कि अर्थमन्त्रीले अहिले राजीनामा दिनुपर्छ कि प्रधानमन्त्रीले उहाँलाई हटाउनुपर्छ र तत्काल छानबिन गर्नुपर्छ ।'
करका दर हेरफेरकाे विषय सामान्य कुरा नभएकाे भन्दै उहाँले साे विषयलाई यत्तिकै छाेड्ने भने गलत नजिर बस्ने बताउनुभयाे । छानबिन भएपछि सत्यतथ्य थाहा पाइने सांसद् थापाले बताउनुभयाे । 'मलाई लागेको यो अर्थमन्त्रीजीको पनि हितमा छ, तत्काल उहाँले राजीनामा दिने वा प्रधानमन्त्रीजीले उहाँलाई अहिले हटाएर यसको छानबिन गर्ने, छानबिन गरेपछि दोषी हो भने दोषीले यसको सजाय प्राप्त गर्ने नै कुरा भयो, दोषी होइन भने कम्तिमा देशलाई, जनतालाई थाहा भयो, यो होइन रहेछ भन्ने कुरा थाहा हुन्छ ।'
अर्थमन्त्री शर्मालाई राजीनामाका लागि आफूहरुले अनौपचारिक रुपमा भनिसकेको पनि थापाले जानकारी दिनुभयाे । प्रमुख प्रतिपक्षले पनि आजकाे बैठकमा कुरा उठाइरहेकाे सांसद् थापाकाे भनाइ छ ।
