काठमाडाैं । नेकपा एमालेका सांसद् कृष्णभक्त पोखरेलले वैवाहिक अंगीकृत नागरिकतासम्बन्धी प्रावधान सच्चाउन माग गर्नुभएकाे छ ।
सरकारले सदनमा पेस गरेकाे नागरिकता विधेयकमाथिकाे छलफलमा भाग लिँदै सांसद् पाेखरेलले प्रस्तावित विधेयकमा वैवाहिक अंगीकृत नागरिकताबारे मौन रहनुको कारण सरकारसँग माग गर्नुभयाे । विदेशी बुहारीलाई बिहे गरेर आउने वित्तिकै नागरिकता दिने प्रावधान संशोधन गर्न पनि उहाँले माग गर्नुभयाे ।
विदेशी बुहारीलाई आउने वित्तिकै नागरिकता दिने प्रचलन विश्वका कुनै देशमा नभएको सांसद् पाेखरेलले बताउनुभयाे । 'बिदेशी बुहारीले बिहे गरेर आउने बित्तिकै भाेलिपल्ट गरिकता पाउने विश्वकाे एउटा देशकाे नाम दिनुस् गृहमन्त्रीज्यू ? भारतमा नेपाली चेलीले बिहे गरेर गएपछि नागरिकता पाउन ७ वर्ष लाग्छ, अमेरिका-अष्ट्रेलिया h जहाँ पनि कम्तिमा ४-५ वर्ष लाग्छ, तर कति पनि हुन्न विवाह गरेर आउने बित्तिकै नागरिकता पाउनुपर्छ भन्ने हुनु हुँदैन, यसमाथि छलफल गरौं र एउटा निष्कर्षमा पुगौं'-सांसद् पाेखरेलकाे भनाइ छ ।
संविधानमै कुनै पनि नेपाली नागरिकलाई नागरिकताकाे हकबाट बञ्चित गरिनेछैन भनेर प्रष्ट लेखिएकाे सांसद् पाेखरेलले संविधानले ताेकेका व्यक्तिलाई नागरिकता दिइनुपर्ने बताउनुभयाे ।
एमालेले ल्याएकाे विधेयकलाई फिर्ता गर्नुपर्ने कुनै कारण नरहेकाे समेत उहाँले स्मरण गराउनुभयाे । संविधानकाे धारा १२ मा रहेकाे कुरा काट्ने अधिकार कहाँ छ भन्दै उहाँले गृहमन्त्री बालकृष्ण खाँडलाई प्रश्न गर्नुभयाे । नागरिकता विधेयक चाँडाे पास गर्नुपर्ने पक्षमा एमाले रहेकाे भन्दै उहाँले १० लाख नागरिक नागरिकताबिहीन भएकाे अवस्थामा छिटो टुंग्याउनुपर्ने बताउनुभयाे । यस विषयमा गम्भीरपूर्वक छलफल गर्नुपर्ने उहाँकाे सुझाव छ ।
