काठमाडौं । नेपाल नागरिकता (पहिलो संशोधन) विधेयक, २०७९ माथि विचार गरियाेस् भन्ने प्रस्ताव प्रतिनिधि सभाबाट बहुमतले स्वीकृत भएकाे छ ।
शुक्रबार बसेकाे प्रतिनिधि सभाकाे पहिलाे बैठकमा विधेयकमाथिको सैद्धान्तिक छलफल सकिएपछि सभामुख अग्निप्रसाद सापकोटाले निर्णयार्थ प्रस्तुत गर्नुभएकाे थियाे । त्यसपछि सभामुख सापकाेटाले साे विधेयक बहुमतले स्वीकृत भएकाे घाेषणा गर्नुभयाे ।
विधेयकमाथि विचार गरियोस भन्ने प्रस्तावमाथि भएको छलफलका क्रममा सांसद्हरुले कोही पनि नेपाली नागरिक नागरिकता प्राप्त गर्ने अधिकारबाट वञ्चित हुन नहुने र कुनै पनि गैर नेपालीले नागरिकता प्राप्त गर्ने अवस्था ल्याउन नहुने बताएका थिए । नागरिकता सरल ढंगबाट प्राप्त गर्ने वातावरण बनाउन उनीहरु सरकारको ध्यानाकर्षण गराए ।
सांसद्ले उठाएका प्रश्नहरुको गृहमन्त्री बालकृष्ण खाँडले बिधेयकमा केही समस्या देखिए परिमार्जन गर्न सकिने बताउनुभयो । कुनैपनि नेपाली नागरिक नागरिकताबिहीन हुन नपरोस भन्ने उद्देश्यसाथ नै सरकारले नागरिकता विधेयक ल्याएको उहाँकाे दाबी थियाे । संविधानअनुसार विधेयक ल्याएर नागरिकका अधिकार सुनिश्चित गर्न खोजिएको पनि उहाँले बताउनुभयाे । बुधबार प्रस्तुत विधेयकमाथि बिहीबारदेखि सैद्धान्तिक छलफल सुरु भएको थियो ।
