एसपीपीको निर्णय र कार्यान्वयन अवस्था बारे प्रतिनिधि सभालाई जानकारी गराउनु : सभामुख

काठमाडौं । अमेरिकी स्टेट पाटनरसिप प्रोग्राम (एसपीपी) को सन्दर्भमा सरकारले गरेको निर्णय र कार्य प्रगति प्रतिनिधि सभाले मगाउने भएको छ । प्रतिनिधि सभाको बिहीबार बसेको बैठकमा सभामुख अग्निप्रसाद सापकोटाले एसपीपीका सम्बन्धमा सांसदहरूले उठाएको विषय प्रति आफ्नो ध्यानाकर्षण भएको बताउनुभयो । ‘सो सम्बन्धमा नेपाल सरकारको निर्णय र त्यसको कार्यान्वयन अवस्थाको सम्बन्धमा सदनलाई जानकारी गराउन नेपाल सरकारलाई निदेश गर्दछु’, बैठकमा सापकोटाले भन्नुभयो । सरकारलाई गर्न लागेको एसपीपी सम्झौताको संसद् र सडकमा समेत विरोध भएपछि सरकार सो निर्णयबाट पछि हटेको थियो । सरकारले एसपीपीमा सहभागी नहुने निर्णय गरेको छ । तर त्यसको निर्णय परराष्ट्र मन्त्रालयले अमेरिकालाई पठाएको छैन । त्यस विषयका पत्र तत्काल अमेरिका पठाउन परराष्ट्र मन्त्रालयलाई भनिएको भए मन्त्रालयले पत्र पठाउन आलटाल गरिरहेको छ । परराष्ट्रले अध्ययन गरेर मात्र पत्र पठाउने बताउँदै आएको छ । संसदीय समितिको निर्देशन तथा सरकारको निर्णयलाई समेत अटेर गर्दै परराष्ट्रले पत्र नपठाएको भन्दै सांसदहरूले आलोचना गर्दै आउनुभएको छ । सांसदले यस विषयमा रुलिङ गर्न सभामुखलाई अनुरोध गर्दै आएका थिए ।