नागरिकता विधेयक विधि, पद्धति र संसदीय मूल्य मान्यता विपरीत आयो : नारायणकाजी श्रेष्ठ

काठमाडौं । राष्ट्रिय सभा सदस्य नारायणकाजी श्रेष्ठले नागरिकता पाउन नसकेका नेपालमा जन्मिएका नागरिकको लागि नागरिकता विधेयक आउनु स्वाभाविक भएको बताउनुभएको छ । सोमबार राष्ट्रिय सभा बैठकमा बोल्दै श्रेष्ठले विधेयक लोकतान्त्रिक विधि, पद्धति र संसदीय मूल्य मान्यता अनुसार नआएको भन्दै श्रेष्ठले आलोचना गर्नुभयो । ‘हामी कहाँ जान खोज्दै छौँ ? एकछिन तात्कालिक रूपमा जे मन लागे पनि गर्ने प्रवृत्तिले हामीलाई गलत दिशा तर्फ लैजान्छ’, उहाँले भन्नुभयो । श्रेष्ठले संसदीय समितिमा छलफल भएको विधेयकलाई फिर्ता लिएर अल्पमतको विचार लागु हुने गरी कानुन लागु गर्न विधेयक प्रस्तुत गरेर सरकारले गलत गरेको उहाँले बताउनुभयो । यसले संसदीय व्यवस्थालाई ठिक ठाउँमा नलैजाने श्रेष्ठको भनाइ छ । विवाह गरेर आउने विदेशी नागरिकलाई नेपाली नागरिकता दिन राखिएको सात वर्षको मापदण्ड फेर्नु पर्ने कुनै कारण नरहेको श्रेष्ठले बताउनुभयो । विदेशीसँग विवाह गरेर नेपाल बस्न चाहने नेपाली महिलाको लागि कुनै प्रावधान नै नराख्नु महिला माथिको अन्याय भएको श्रेष्ठले बताउनुभयो ।