भारतमा नागरिकता परित्यागको प्रक्रिया सुरु गर्नेलाई नेपाली नागरिकता दिनुपर्छ : बामदेव गौतम

काठमाडौं । राष्ट्रिय सभा सदस्य बामदेव गौतमले सरकारले नागरिकता विधेयक ल्याउनु ठिक भए पनि त्यसका कतिपय प्रावधान गलत भएका बताउनुभएको छ । सोमबार राष्ट्रिय सभा बैठकमा बोल्दै गौतमले वैवाहिक अङ्गीकृत नागरिकता लिन चाहने महिलाले आफ्नो देशको नागरिकता त्यागेपछि मात्र नेपाली नागरिकता दिनु पर्ने बताउनुभयो । नागरिकताको समस्या समाधान गर्न सरकारले विधेयक ल्याएर ठिक गरेको भए कतिपय कुरा देश हितको पक्षमा नरहेको उहाँले बताउनुभयो । कुनै पनि नागरिकलाई अनागारिक बनाउन नमिल्ने बताउँदै गौतमले भारतबाट विवाह गरेर नेपाल आउनेलाई भारतको नागरिकता परित्यागको प्रक्रिया सुरु गरेको कागज ल्याए पछि नेपाली नागरिकता दिनु पर्ने उहाँको तर्क छ । हाम्रो जस्तो देशको यो जटिल समस्या भएकोले समस्या समाधान गर्नै पर्ने गौतमले बताउनुभयो । ‘यो नेपाली जनताको विशेष अवस्था हो’, गौतमले भन्नुभयो । छोरा छोरी जन्मिने बित्तिकै नेपाली नागरिक बन्ने तर आमाले नागरिकता नपाउने कुरा ठिक नहुने गौतमले बताउनुभयो । त्यसैले अहिले सरकारले ल्याएको विधेयकले गरेको व्यवस्था ठिक भएको उहाँको भनाइ छ ।