काठमाडाैं । प्रतिनिधि सभाको अन्तर्राष्ट्रिय सम्बन्ध समितिले स्टेट पार्टनरसिप प्रोग्राम (एसपीपी) कार्यान्वयन नगर्ने विषयमा अमेरिकालाई पत्राचार नगर्नुको कारणबारे जानकारी गराउन सरकारलाई निर्देशन दिएको छ ।
बुधबार सिंहदरबारमा बसेको समितिकाे बैठकले एसपीपीमा सहभागी नहुने विषयमा अमेरिकालाई पत्राचार नगर्नुको कारणबारे जानकारी गराउन सरकारलाई निर्देशन दिएको हाे । समितिले एसपीपीका विषयमा विभिन्न निर्देशनसँगै कार्यान्वयनको अवस्थाबारे सरकारसँग जानकारी माग गर्ने निर्णय पनि गरेको छ ।
समिति सभापति पवित्रा निरौला खरेलले सरकारले एसपीपीबाट फिर्ता हुने निर्णय गरिसकेको अवस्थामा किन पत्रचार नगरिएको हो भन्ने पनि जानकारी माग गरिएको बताउनुभयो ।
बैठकले नेपाली सेनाका प्रधानसेनापति अष्ट्रेलियामा भैरहेको एक सम्मेलनमा भएको सहभागी भएको विषयमा पनि जानकारी माग गर्ने निर्णय गरेकाे उहाँले बताउनुभयो । तीन पटक सम्म एसपीपीका सम्बन्धमा भएका कागजात मगाइसकेको र प्राप्त नभएको सभापति निराैलाकाे गुनासाे छ ।
बैठकमा समितिका सदस्य माधवकुमार नेपालले एसपीपीमा नेपाल सहभागी नहुने सरकारको निर्णयबाट फिर्ता हुने अवस्था नरहेको भन्दै सरकारको पत्र अमेरिकालाई पठाउन ढिलाइ भएको बताउनुभयो ।
समिति सदस्य प्रकाशमान सिंहले यस बिषयमा सबै कागजात मगाएर नै आवश्यक अध्ययन गर्नुपर्ने बताउनुभयाे । बैठकमा समितिका सदस्य ईश्वर पोखरेलले समितिले मागेको कागजात नपठाउनुले शंका उत्पन्न भएकाे बताउनुभयाे ।
बैठकमा अधिकांश समिति सदस्यले एसपीपीमा नेपाल सहभागी नहुने जानकारीको पत्र अमेरिकालाई पठाउन ढिलाइ हुनुको कारणबारे सरकारले प्रष्ट पार्नुपर्ने बताएका थिए ।
मन्त्रिपरिषद्ले एसपीपीमा सहभागी नहुने भन्ने निर्णय गरेकाे थियाे । साे निर्णय कार्यान्वयनका लागि परराष्ट्र मन्त्रालयमार्फत अमेरिकालाई पत्राचार गर्ने बताइएकाे थियाे । तर परराष्ट्रले पत्रबारे अध्ययन भइरहेकाे भन्दै अहिलेसम्म साे पत्र मन्त्रालयमै राेकेर राखेकाे छ ।
