काठमाडौं। आइतबार प्रतिनिधि सभा बैठकको शून्य समयमा बोल्ने सांसदहरूले बाढी पहिरा पीडितको व्यवस्थापन गर्न सरकारको ध्यानाकर्षण गराउनुभएको छ । बैठककको शून्य समयमा बोल्दै सांसद् लक्ष्मी परियारले उदयपुरमा २ हजार ५ सय परिवार सप्तकोसीको बाढीको कारण प्रभावित भएको भन्दै उनीहरूलाई राहत र पुनर्वासको व्यवस्था मिलाउन माग गर्नुभयो । सांसद् लालप्रसाद सावाँ लिम्बुले झापामा कन्काई लगायतका नदीले कटान गरेको बताउनुभयो । प्रभावित बस्तीको तत्काल व्यवस्थापन गर्न उहाँले माग गर्नुभयो । लिम्बुले आपत्कालीन नदी व्यवस्थापन गर्न माग गर्नुभयो । सांसद् लालबहादुर थापाले बुढीगंगाको बाढी र पहिरोले धेरै घर परिवार विस्थापित भएकोले उनीहरूको उचित व्यवस्थापन गर्न सरकारसँग माग गर्नुभयो । साथै अवरुद्ध सडक खुलाउन उहाँले माग गर्नुभयो । बैठकमा सांसद् विद्या भट्टराईले पोखराका विभिन्न सडक अवरुद्ध भएका भन्दै ती सडक तत्काल सञ्चालनको माग गर्नुभयो । सांसद् विनाकुमारी श्रेष्ठले काठमाडौंको फोहोर तत्काल व्यवस्थापन गर्न माग गर्नुभयो । फोहोर व्यवस्थापनको लागि उचित कार्ययोजना बनाएर काम गर्न पनि उहाँले सुझाव दिनुभयो । सांसद् विनादेवी बुढाथोकीले कञ्चनपुरमा बाढीका कारण धेरै बस्ती असुरक्षित भएकाले व्यवस्थापनको मग गर्नुभयो । बाढीले नहरका बाँध भत्काउने र जमिन कटान गर्ने गरेकोले त्यसलाई रोक्न माग गर्नुभयो । सांसद् बिन्दा पाण्डेले गठबन्धनको नामामा महिलाको अधिकार खोसिएको भन्दै सरकार र सदनको ध्यानाकर्षण गराउनुभयो । सांसद् विमला विश्वकर्माले सरकारलाई रेलमार्गको कामलाई निरन्तरता दिन आग्रह गर्नुभयो । यथाशीघ्र मुआब्जा वितरण गरी जनताको रोक्का रहेको जग्गा फुकुवा गर्न उहाँले माग गर्नुभयो । सांसद् विष्णु शर्माले अस्पतालमा औषधिको अभाव भएको बताउँदै त्यसको तत्काल व्यवस्था गर्न माग गर्नुभयो । अर्का सांसद् शक्तिबहादुर बस्नेतले कर्णाली र सुदूरपश्चिममा अप्टिकल फाइबर विच्छ्याउने काम किन रोकिएको ? भन्दै प्रश्न गर्नुभयो । सांसद् शान्ता चौधरीले बजार भाउ अति बढेको बताउनुभयो । नेपालमा पनि एक झोला सामान किन्न एक झोला पैसा लिएर जानु पर्ने अवस्था आउन लागेको चौधरीले बताउनुभयो । सरकारको काम महँगी टुलुटुलु हेरे बस्ने नभएको भन्दै उहाँले सरकारको आलोचना गर्नुभयो । अर्की सांसद् डा. शिवमाया तुम्बाहाम्फेले अभिलेख देशको प्रगतिको मापदण्ड भएको बताउँदै राष्ट्रिय अभिलेखालयका कागजातलाई सुरक्षित राख्न ध्यानाकर्षण गराउनुभयो । सांसद् शेरबहादुर तामाङले मेलम्चीमा गएको पहिरोले ३० घर जोखिममा परेका तथा विभिन्न ठाउँमा सडकमा पहिरो गएको भन्दै सरकारको ध्यानाकर्षण गराउनुभयो । गाँजा खेती सम्बन्धी विधेयक छलफलमा ल्याउन पनि उहाँले माग गर्नुभयो । सांसद् सत्यनारायण शर्मा खनालले वर्षा सुरु भएसँगै जताततै पहिरो र बाढी आउने क्रम बढेकोले त्यसमा सरकारको ध्यान जानु पर्नेमा जोड दिनुभयो । सांसद् सत्य पहाडीले निःशुल्क स्वास्थ्य सेवाको हकलाई सुरक्षित गर्न माग गर्नुभयो । अहिले पनि स्थानीय तहमा आधारभूत स्वास्थ्य अस्पताल सञ्चालन नभएको प्रति उहाँले ध्यानाकर्षण गराउनुभयो । सांसद् समिना हुसेनले मधेसमा फेरी आपराधिक गिरोह उत्पत्ति भएको भन्दै सरकारको ध्यानाकर्षण गराउनुभयो । त्यस्तो गिरोहले नक्कली कागज बनाएर नागरिक ठगेको उहाँले बताउनुभयो । सांसद् सरलाकुमारी यादवले अहिले पनि विद्यार्थीको हातमा पुस्तक नपुगेको भन्दै आलोचना गर्नुभयो । उहाँले तराईका जिल्लामा समेत पुस्तक नपुगेको प्रति सरकारको ध्यानाकर्षण गराउनुभयो । सांसद् सरिताकुमारी गिरीले नेपाल आयल निगमलाई निजीकरण गर्ने प्रयास भएको भन्दै सरकारको आलोचना गर्नुभयो । उहाँले किसानलाई मल र विद्यार्थीलाई पुस्तक पुर्याउन आग्रह गर्नुभयो । सांसद् सिताराम महतोले सुनसरीको इनरुवादेखि भारतसम्मको हुलाकी सडकको बाटो ठेक्कामा लाग्दा पनि काम नभएको भन्दै आलोचना गर्नुभयो । वर्षाको कारण विभिन्न ठाउँमा सडक बिग्रिएकाले त्यसको मर्मतको लागि पनि उहाँले माग गर्नुभयो । सांसद् डा.सूर्यप्रसाद पाठकले अस्पतालमा डाक्टरको व्यवस्था गर्न माग गर्नुभयो । ६ वर्षदेखि पुल निर्माणको काम अलपत्र भएकोले त्यसको काम तत्काल अघि बढाउन उहाँले माग गर्नुभयो । सांसद् सञ्जयकुमार गौतमले नेपालको भाषा, संस्कृति र मात्र होइन इतिहास समेत संकटमा परेको बताउनुभयो । त्यसैले पाठ्यक्रममा सुधार गरी यसलाई जोगाउन उहाँले माग गर्नुभयो । सांसद् हितबहादुर तामाङले आत्मनिर्भर अर्थतन्त्र बनाउने कुरामा लाग्नुपर्नेमा जोड दिनुभयो । किसानले गरेको उत्पादनको बजारीकरणको उचित व्यवस्थापन गर्न उहाँले सरकारसँग माग गर्नुभयो ।
प्रतिनिधि सभाको शून्य समय : बाढी-पहिरो प्रभावितको व्यवस्थापन गर्न माग
काठमाडौं। आइतबार प्रतिनिधि सभा बैठकको शून्य समयमा बोल्ने सांसदहरूले बाढी पहिरा पीडितको व्यवस्थापन गर्न सरकारको ध्यानाकर्षण गराउनुभएको छ । बैठककको शून्य समयमा बोल्दै...
SUNRISE KHABAR
3 min read
