काठमाडाैं । नेकपा एमालेकी सांसद् निरु पालले दुई तिहाइ मत छैन भन्ने जान्दाजन्दै पनि सत्तापक्षले प्रधानन्यायाधीश चाेलेन्द्र शमशेर जबरा विरुद्ध महाभियोग प्रस्ताव ल्याएकाे बताउनुभएकाे छ ।
आइतबार बसेकाे प्रतिनिधि सभा बैठकमा महाभियाेग प्रस्तावमाथिकाे छलफलमा भाग लिँदै सांसद् पालले सत्तापक्षले हचुवाको भरमा महाअभियोग प्रस्ताव ल्याएकाे बताउनुभयाे । आफैं काम चलाउ भइसकेकाे अवस्थामा सरकारले यति गम्भीर प्रस्ताव ढिलागरी अगाडि बढाएकाे पालले बताउनुभयाे ।
उहाँले प्रश्न गर्नुभयाे - 'हामीसँग दुई तिहाई छैन भन्ने थाहा हुँदाहुँदै हचुवाका भरमा जबरामाथि महाभियोग किन र के का लागि लगाइकाे थियाे ? किन हालसम्म किनाारा लगाइएन भन्ने कुरा तथ्य र तर्कसहित सत्तापक्ष र आम जनतालाई जानकारी गराउन माग गर्छु ।'
क्षणिक राजनीतिक अभिष्ट पूरा गर्न महाभियाेग लगाइएकाे हाे भन्ने प्रश्न गर्दै सांसद् पालले भन्नुभयाे - 'जबरालाई महाभियोगको डण्डामार्फत उहाँको करिअर ड्यामेज गर्न खोजिएको हो ? जबरालाई देखाएर अरु कसैलाई तर्साउनका लागि डण्डा चलाइयाे वा बिना अध्ययन किन याे प्रस्ताव दर्ता गरियाे ? हचुवाका भरमा कसैलाई देखाइदिनु भन्ने नाममा लगाइएका यस्ता प्रस्तावले कसैकाे भलाे हुँदैन, गल्ती गर्नेलाई चोख्याएर उन्मुक्ति दिने तर बिना गम्भीर कसुर कसैलाई ड्यामेज गर्ने काम कदापी राम्रो होइन, परमादेशी सरकारलाई अलिकति नैतिकता हुन्थ्याे भने आफैंलाई जन्माउनेमाथि तुक न तर्कबिनाकाे प्रस्ताव दर्ता गराउँदैन्थ्याे हाेला ।'
बिना कसुर हतारहतार पूर्व प्रधानन्यायाधीश सुशीला कार्कीमाथि पनि अहिलेकै गठबन्धनमा रहेका दलले महाभियाेग प्रस्ताव दर्ता गराइएकाे उहाँले स्मरण गराउनुभयाे । एमाले लगायतकाे विराेधले पछि फिर्ता लिन सरकार वाध्य भएकाे उहाँले बताउनुभयाे । कामुलाई निरिह बनाइ न्यायपालिकामाथि हस्तक्षेप गरेर सरकारले के पायाे भन्दै उहाँले प्रश्न उठाउनुभयाे ।
