काठमाडौं । सांसद् हृदेयश त्रिपाठीले संघीय निजामती ऐन तत्काल जारी गर्न माग गर्नुभएकाे छ ।
मंगलबार बसेकाे प्रतिनिधि सभा बैठकमा विशेष समय लिएर बोल्दै सांसद् त्रिपाठीले संघीय निजामती ऐन तत्काल जारी गर्न माग गर्नुभयाे । नेपालकाे संविधान जारी भएलगत्तै निजामती एेन जारी हुनुपर्नेमा त्यसाे हुन नसक्नु दु:खद भएकाे उहाँले बताउनुभयाे ।
तीनै तहकाे सरकारका लागि अत्यावश्यक रहेकाे साे एेन तत्काल जारी हुनुपर्ने सांसद् त्रिपाठीले बताउनुभयाे । एेन जारी नहुँदा समायाेजन भएर गएकालाई निजामती मान्ने नमान्ने द्विविधा रहेकाे उहाँले बताउनुभयाे । सांसद् त्रिपाठीले प्रदेश सचिव र प्रशासकीय अधिकृत खटाउने स्पष्ट व्यवस्था नभएकाे र हचुवाका भरमा भइरहेकाे भन्दै गम्भीर ध्यानाकर्षण गराउनुभयाे ।
उहाँले भन्नुभयाे - 'स्थानीय सेवा र प्रदेश सेवाको गठन हुन सकेको छैन, स्थानीय तहमा ८ प्रकृतिका कर्मचारी छन्, जसलाई समायोजन गर्न सकिएको छैन, कर्मचारीको सरुवा-बढुवा प्रभावित भएको छ, शासन प्रशासन सञ्चालनका लागि निकै महत्वपूर्ण छ,अहिले आएर कहाँ रोकिएको छ ? कहाँ अड्किएको छ ? यसको सोधीखोजी होस् ।'
सांसद् त्रिपाठीले कर्मचारीको तलबमान वृद्धिमा द्विविधा देखिएकाे बताउनुभयाे । उहाँले भन्नुभयाे - 'अहिले सरकारले कर्मचारीको तलबमान वृद्धि गरेको छ, यसमा द्विविधा देखिएकाे छ, राजपत्र अनंकितकाे १५ प्रतिशत, राजपत्र अंकितको २४ देखि २६ प्रतिशत तलब वृद्धि भएकाे छ, जसका कारण नायब सुब्बाहरू पेनडाउनमा छन्, जहाँ गहिरो उहीँ पानी हुनुभएन, जल्लाई कम चाहियाथ्यो उल्लाउ बढी, जल्लाई बढी चाहियाथ्यो उस्लाई कम, यसप्रकारको तलबमान वृद्धि गर्नु उचित होइन ।'
