राष्ट्रपति राष्ट्रको गरिमा हो, विवादमा पर्ने काम नगरौँ : विशाल भट्टराई | Sunrise Khabar

काठमाडौं । प्रतिनिधि सभा सदस्य विशाल भट्टराईले नागरिकता संशोधन विधेयकको विषयलाई लिएर राष्ट्रपतिलाई विवादमा नपार्न आग्रह गर्नुभएको छ । मंगलबार प्रतिनिधि सभा बैठकमा बोल्दै प्रतिनिधि सभामा प्रमुख सचेतक समेत रहनुभएका भट्टराईले राष्ट्रपतिले संवैधानिक व्यवस्था अनुसार नै विधेयक पुनर्विचारको लागि प्रतिनिधि सभामा फिर्ता पठाउनुभएको बताउनुभयो । भट्टराईले राष्ट्रपतिलाई पटक पटक विवादमा पर्ने प्रयास गरेको भन्दै आलोचना गर्नुभयो । ‘राष्ट्रपति हाम्रो संस्था हो, गणतन्त्र आइसके पछिको एउटा प्रतिकात्मक रूपमा राष्ट्राध्यक्ष, राष्ट्र प्रमुख हाम्रो राष्ट्रको गरिमा पनि हो, त्यो ठाउँलाई, त्यो संस्थालाई अनेक ढङ्गले विवादित गर्ने काम अनेक बारम्बार भइरहेको छ’, उहाँले भन्नुभयो । एमालेको पालामा लगिएको अध्यादेशलाई पास गर्ने तर प्रतिनिधि सभाले पठाएको विधेयक फिर्ता गरेको भन्ने आरोपको खण्डन गर्दै भट्टराईले अध्यादेश फिर्ता गर्ने संवैधानिक व्यवस्था नै नरहेको बताउनुभयो । विगतमा एमालेले लगेको मात्र होइन शेरबहादुर देउवाले लगेको दल विभाजन सम्बन्धी अध्यादेशमा पनि राष्ट्रपतिले हस्ताक्षर गरेर पठाएको उहाँले स्मरण गराउनुभयो । विधेयक भने पुनर्विचारको फिर्ता पठाउने कानुनी प्रावधान रहेको तर्फ उहाँले ध्यानाकर्षण गर्नुभयो । ‘विधेयक र अध्यादेशलाई किन एक ठाउँ बनाएर मिसमास गर्न चाहन्छौँ र विवादित बनाउन चाहन्छौँ’, भट्टराईले भन्नुभयो । नागरिकता संशोधन सम्बन्धी विधेयक पुनर्विचारको लागि फिर्ता आउनु एउटा अवसर भएको उहाँले बताउनुभयो । यसले नागरिकता जस्तो विषयमा राष्ट्रिय सहमति बनाउने अवसर जुटेको उहाँले प्रष्ट पार्नुभयो । भट्टराईले अहिलेको नागरिकता सम्बन्धी विधेयक राष्ट्र हितको पक्षमा नरहेको बताउनुभयो । यो विदेशीको इसारामा आएको विधेयक भएको उहाँले दाबी गर्नुभयो ।

शेयर गर्नुहोस्: