काठमाडौं । नेकपा एमालेका सांसद् पदम गिरीले सत्ता गठबन्धनले देश डुबाउने गतिविधि गरिरहेकाेकाे बताउनुभएकाे छ।
बिहीबार बसेकाे प्रतिनिधि सभा बैठकमा नागरिकता विधेयकमाथिको छलफलमा भाग लिँदै सांसद् गिरीले गठबन्धन टिकाउन विवादित नागरिकता विधेयकमा देश डुबाउने खालकाे प्रावधान राखिएकाे भन्दै आपत्ति जनाउनुभयाे ।
गठबन्धन टिकाउन देश डुबाउने खालकाे प्रावधान राखेर विधेयक पारित गर्ने तयारी भइरहँदा राष्ट्रपति विद्यादेवी भण्डारीले पुर्नविचारका लागि फिर्ता पठाएर राम्राे काम गर्नुभएकाे सांसद् गिरीले बताउनुभयाे । तर राष्ट्रपतिले छलफल गर्न आवश्यक भनेका ८ बुँदामा कुरै नगरी सत्ता गठबन्धनले जस्ताको त्यस्तै पारित गर्न खोज्नु आपत्तिजनक रहेको उहाँकाे भनाइ छ ।
विदेशी चेलीलाई बिहे गरेकै भाेलिपल्ट नागरिकता दिने विधेयक प्रावधान कुनै हालतमा ठिक नहुने सांसद् गिरीले बताउनुभयाे । 'गठबन्धन भन्दा ठूलो देश र जनता हुन्, जनताले हेरिरहेका छन्, गठबन्धन दलले देश डुबाउने काम नगरुन्, राष्ट्रपतिले ८ बुँदामा छलफल गर्न पठाएको नागरिकता विधेयक फेरि जस्ताको त्यस्तै पठाउने तयारी भएको छ, यो एकदमै गलत हुँदैछ'-गिरीकाे भनाइ छ ।
अध्यादेश र विधेयकमा सम्बन्धमा भन्दै उहाँले अध्यादेशमा पुर्नविचार गर्ने व्यवस्था नभएकाे तर विधेयकमा पुर्नविचार गर्न राष्ट्रपतिले फिर्ता गर्ने व्यवस्था रहेकाे स्मरण गराउनुभयाे । राष्ट्रपतिलाई अनावश्यक रुपमा विवादमा पार्ने काम नगर्न सत्ता गठबन्धनलाई चेतावनी दिनुभयाे ।
यसअघि २२ महिना लगाएर राज्यव्यवस्था तथा सुशासन समितिमा छलफल गरेकाे विधेयक राेकेर नयाँ विधेयक ल्याउने काम गठबन्धन सरकारले गरेकाे उहाँले बताउनुभयाे । गठबन्धन सरकारले समितिमा नलगी सतही छलफल गराएर बहुमतकाे बलमा हठात्मा पास गरेकाे सांसद् गिरीले बताउनुभयाे ।'
