काठमाडौं । राष्ट्रिय जनमोर्चाकी सांसद् दुर्गा पौडेलले राष्ट्रपति विद्यादेवी भण्डारीले सन्देशसहित फिर्ता गरेको नागरिकता विधेयक खारेज गर्नुपर्ने बताउनु भएकाे छ ।
बिहीबार बसेकाे प्रतिनिधि सभा बैठकमा नागरिकता विधेयकमाथिकाे छलफलमा भाग लिँदै जनमोर्चा उपाध्यक्ष समेत रहनुभएकी सांसद् पौडेलले राष्ट्रपतिबाट फिर्ता विधेयकलाई खारेज गरेर अर्को विधेयक ल्याउनुपर्ने बताउनुभयाे ।
राष्ट्रपतिलाई धन्यवाद दिँदै उहाँले विधेयक फिर्ता गर्ने कदमको स्वागत गर्नुभयाे । फिर्ता विधेयकलाई खारेज गरेर नागरिकताका विषयमा व्यापक छलफल गरेर अर्को विधेयक ल्याउन उहाँले सरकारकाे ध्यानाकर्षण गराउनुभयाे ।
खुला सिमाना भएको देशमा नागरिकता दिने विषयलाई निश्चित विधि बनाएर मात्रै अघि बढ्नुपर्ने सांसद् पाैडेलले बताउनुभयाे । नागरिकता देशको अखण्डता र राष्ट्रियतासँग जोडिएको विषय भन्दै उहाँले विवाह गर्नेवित्तिकै कुनै पनि विदेशी नेपाली नागरिक हुन योग्य नहुने बताउनुभयाे । 'खुला सिमाना भएको देशमा विवाह गरेकै आधारमा नागरिकता प्राप्त गर्न योग्य हुने हो भने हमी फिजी हुने सम्भावना पनि छ'- उहाँकाे भनाइ छ ।
विवाह गरेलगत्तै अंगीकृत नागरिकता पाउने व्यवस्था विश्वमा कहीँ पनि नभएको बताउँदै सांसद् पाैडेलले भन्नुभयाे - 'खुला रुपले जन्मको आधारमा र बैबाहिक नागरिकताको आधारमा नागरिकता दिन सकिँदैन, त्यसैले यो नागरिकता विधेयकलाई खारेज गरेर जानुपर्छ, त्यसको निम्ति आफूसँग छिमेकी देशले जुन व्यवहार गर्छ, त्यही व्यवहार गरौं, हाम्रो नेपाली चेलीहरुलाई विवाह गरेर लाने देशहरुले कुन प्रकारको व्यवहार गरेका छन ?'
अंगीकृतका रुपमा ७ वर्षको उमेर हद तोक्नै पर्ने पनि उहाँले बताउनुभयाे । अंगीकृत नागरिकताको लागि ७ वर्षे प्रावधान तोकेरै जानुपर्छ भन्ने जनमाेर्चाकाे स्पष्ट धारणा रहेकाे दाबी पनि पाैडेलले गर्नुभयाे ।
