काठमाडाैं । नेपाली कांग्रेसका सांसद् गगन थापाले नागरिकता विधेयकमा राष्ट्रपति विद्यादेवी भण्डारीले उठाउनुभएका विषय महत्वपूर्ण रहेका बताउनुभएकाे छ ।
बिहीबार बसेकाे प्रतिनिधि सभा बैठकमा नागरिकता विधेयकमाथिकाे छलफलमा भाग लिँदै सांसद् थापाले राष्ट्रपतिले उठाउनुभएका कतिपय विषय निक्कै महत्वका रहेकाले ती विषयमा छलफल हुनुपर्ने बताउनुभयाे । राष्ट्रपतिले उठाउनुभएका कतिपय विषय नागरिकता विधेयकमा नरहेपनि ती विषय छलफल गर्ने खालका रहेका उहाँकाे भनाइ छ ।
राष्ट्रपति भण्डारीले आमाको आत्मसम्मानमा चोट नपुगोस् भन्नेतर्फ सचेत गराउनुभएकाे, वैवाहिक अंगीकृतका विषयमा सबै दलबीच साझा धारणा बनाउन सुझाउनुभएकाे थापाले सुनाउनुभयाे । राष्ट्रपतिले उठाउनुभएकाे लैंगिक समानताका विषयलाई पछि थप्नैपर्ने पनि उहाँले बताउनुभयाे । विधेयकमा धेरै महत्वपूर्ण कुरा छुटेकाे भन्दै उहाँले ती विषय पछि समेट्नुपर्ने बताउनुभयाे ।
विधेयकमा व्यवस्था नै नभएको विषयमा बढी चर्चा भएकाे सांसद् थापाले बताउनुभयाे 'वैवाहिक अंगीकृत नागरिकताका विषयमा ४० वर्षदेखि एउटा व्यवस्था छ, त्यसलाई यो विधेयकले छोएको छैन,पूर्व प्रधानमन्त्री केपी शर्मा ओलीले अध्यादेश ल्याउँदा पनि छोएको थिएन, त्यही विषयमा बढी चर्चा गरिरहेका छौँ ,नछोएको कुरामा बहस भइरहेको छ ।'
