काठमाडौं । प्रतिनिधि सभाकाे बैठक आज पनि बस्दैछ ।
बैठक संघीय संसद् भवन नयाँ बानेश्वरमा बिहान १० बजे बस्न लागेकाे हाे । बैठकमा 'बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग (तेस्रो संशोधन) विधेयक, २०७९' लाई प्रस्तुत गर्न अनुमति माग्ने प्रस्तावमाथि प्रेम सुवालले प्रस्तुत गरेको विरोधको सूचनालाई निर्णयार्थ प्रस्तुत गर्ने सम्भावित कार्यसूची छ ।
बैठकमा कानुन, न्याय तथा संसदीय मामिला मन्त्री गोविन्द प्रसाद शर्मा (कोइराला) ले 'बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग (तेस्रो संशोधन) विधेयक, २०७९' प्रस्तुत गर्नुहुने सम्भावित कार्यसूची रहेको संसद् सचिवालयले जनाएको छ ।
यसअघि साेमबार बसेको प्रतिनिधि सभा बैठक कांग्रेस नेता एवं सांसद् प्रदीप गिरीको निधनमा शोक प्रस्ताव पारित गर्दै आजसम्मका लागि स्थगित भएको थियो ।
